काठमाडौँ, माघ ६ । युवाहरूमा व्यावसायिक सीपको प्रवर्द्धन गर्ने उद्देश्यले आयोजित सातौँ संस्करणको ‘स्किल विक २०२६’ एक विशेष समारोहका साथ ललितपुरमा सम्पन्न भएको छ। ग्लोकल प्रा. लि. अन्तर्गतको ‘ग्लोकल आफ्टर स्कूल’ द्वारा आयोजित यस कार्यक्रमको समापनमा सीपका क्षेत्रमा उल्लेखनीय योगदान पुर्याउने पाँच व्यक्तित्वहरूलाई ‘स्किल हिरो अवार्ड’ बाट सम्मानित गरिएको छ।
सीप र दक्षताको साताव्यापी उत्सव पुस २७ देखि माघ २ गते (जनवरी ११–१६) सम्म सञ्चालित यस कार्यक्रमलाई शिक्षा, मनोरञ्जन र प्रयोगात्मक सिकाइको संगमका रूपमा मनाइएको थियो। साताभरि विभिन्न कार्यशाला, सीप केन्द्रित प्रतियोगिता, प्रदर्शनी र रोजगार मेला जस्ता गतिविधिहरू सञ्चालन गरिएका थिए। कार्यक्रम विशेषगरी कला र संस्कृति, उद्यमशीलता, पर्यटन तथा आतिथ्य, र विज्ञान तथा प्रविधि गरी चार मुख्य क्षेत्रमा केन्द्रित रहेको थियो।
पाँच विधामा ‘स्किल हिरो अवार्ड’ आफ्नो कार्यक्षेत्रमा उत्कृष्ट सीप प्रदर्शन गरी समाजमा सकारात्मक प्रभाव पार्न सफल निम्न पाँच व्यक्तित्वहरूलाई यस वर्षको ‘स्किल हिरो अवार्ड’ प्रदान गरियो:
-
पर्यटन र आतिथ्य: श्री ऋषभ अग्रवाल – अन्तर्राष्ट्रिय स्तरको पाक कलालाई नेपाली स्वादसँग जोड्दै ‘सिल्क आर्टिसनल क्रिमरी’ मार्फत मौलिक पहिचान निर्माण गरेबापत।
-
कला र संस्कृति: श्री किशोर कायस्थ – विगत दुई दशकदेखि छायाङ्कन (फोटोग्राफी) मार्फत नेपालको फेरिएको भूगोल र जनजीवनलाई कलात्मक रूपमा प्रस्तुत गरेबापत।
-
उद्यमशीलता: सुश्री अनुष्का श्रेष्ठ – ‘मक्कुसे’ ब्राण्डमार्फत परम्परागत नेपाली मिठाईलाई आधुनिक र विश्वव्यापी बजारमा पुर्याउन सफल भएकोमा।
-
विज्ञान र प्रविधि: श्री समीर फुयाँल – ‘बाइटकेयर टेक्नोलोजी’ मार्फत साना व्यवसायीका लागि डिजिटल लेखा प्रणाली ‘कारोबार एप’ विकास गरेबापत।
-
प्रशिक्षुता (Apprenticeship): सुश्री सोनाम नेम्वाङ – सूचना प्रविधिको क्षेत्रमा प्रशिक्षुतामार्फत व्यावसायिक सफलता हासिल गरी युवाहरूका लागि प्रेरणा बनेबापत।
छलफल र सहकार्य कार्यक्रमका क्रममा माघ २ गते पुल्चोकस्थित एम्बार्क कलेजमा ‘सीप मेला’ (स्किल फेस्ट) र ‘सिइओ अनप्लग’ को ११ औँ संस्करण समेत आयोजना गरिएको थियो। उक्त सत्रमा उद्योगीहरू सौरभ ज्योति, सञ्जय गोल्छा र आँचल कुँवर लगायतले भविष्यको बजारमा सीपको आवश्यकता र शिक्षा एवं उद्योगबीचको समन्वयका विषयमा मन्थन गर्नुभएको थियो।
यस अभियानलाई एम्बार्क कलेज, युरोपियन युनियन, भारतीय राजदूतावास, अस्ट्रेलियाली सरकार, संयुक्त अरब इमिरेट्स (युएई) राजदूतावास, होण्डा र विभिन्न संयुक्त राष्ट्रसंघीय निकायहरूले सहयोग पुर्याएका थिए।
