काठमाडौं । जलविद्युत क्षेत्रमा लगानीको नयाँ अवसर खुल्ने भएको छ। टक्सार पिखुवा खोला हाइड्रोपावर लिमिटेडले आगामी फागुन २७ गतेदेखि साधारण शेयर (आईपीओ) निष्कासन तथा बिक्री खुला गर्ने भएको हो। कम्पनीले पहिलो चरणमा आयोजना प्रभावित स्थानीय र वैदेशिक रोजगारीमा रहेका नेपालीहरूका लागि शेयर जारी गर्न लागेको हो।
कसले कति शेयर पाउने?
नेपाल धितोपत्र बोर्डबाट ४२ करोड ३० लाख ६६ हजार ८०० रुपैयाँ बराबरको शेयर जारी गर्न अनुमति पाएको यस कम्पनीले विभिन्न समूहका लागि शेयर सुरक्षित गरेको छ:
-
स्थानीय बासिन्दा: भोजपुर जिल्लाका बासिन्दाका लागि १२ लाख कित्ता शेयर छुट्याइएको छ।
-
वैदेशिक रोजगारीमा रहेका नेपाली: श्रम स्वीकृति प्राप्त गरी विदेशमा रहेका नेपालीका लागि ३ लाख ३ हजार ६७ कित्ता शेयर सुरक्षित छ।
-
अन्य: सामूहिक लगानी कोषका लागि १ लाख ५१ हजार ५३३ कित्ता र कर्मचारीका लागि ६० हजार ६१३ कित्ता शेयर व्यवस्था गरिएको छ।
लगानीको सीमा र म्याद
यस आईपीओमा लगानीकर्ताले न्यूनतम १० कित्तादेखि अधिकतम ५० हजार कित्तासम्मका लागि आवेदन दिन सक्नेछन्।
| समूह | आवेदन सुरु | छिटोमा बन्द | ढिलोमा बन्द |
| वैदेशिक रोजगारीमा रहेका | फागुन २७ | चैत १ | चैत ११ |
| आयोजना प्रभावित स्थानीय | फागुन २७ | चैत ११ | चैत २६ |
कहाँबाट दिने आवेदन?
भोजपुरका स्थानीयले प्रभु बैंक (भोजपुर, प्याउली, हटुवागढी), सिटिजन्स बैंक (भोजपुर) र प्रभु क्यापिटलबाट आवेदन दिन सक्नेछन्। वैदेशिक रोजगारीमा रहेका नेपालीले भने मेरो शेयर र सी-आस्बा प्रणालीमार्फत सहजै आवेदन दिन सक्ने कम्पनीले जनाएको छ।
