काठमाडौं । परीक्षा प्रणालीलाई व्यवस्थित र शान्त वातावरणमा सञ्चालन गर्ने उद्देश्यसहित यस वर्षको माध्यमिक शिक्षा परीक्षा (SEE) मा सामूहिक अनुगमनमा रोक लगाइएको छ।
राष्ट्रिय परीक्षा बोर्ड ले परीक्षा केन्द्रमा विभिन्न सङ्घसंस्था तथा समूहका प्रतिनिधिहरू अनुगमनका नाममा हलभित्र प्रवेश गर्दा परीक्षार्थीको लेखन कार्यमा अवरोध पुगेको गुनासो आएपछि यस्तो निर्णय गरेको हो।
बोर्डका अनुसार विगतका वर्षहरूमा अनुगमनका नाममा अनावश्यक भीडभाड र असहज वातावरण सिर्जना भएको देखिएको थियो, जसले विद्यार्थीको ध्यान केन्द्रित गर्न कठिनाइ भएको पाइएको छ।
यस वर्षदेखि परीक्षा केन्द्रमा सामूहिक रूपमा हलभित्र प्रवेश गरी अनुगमन गर्ने व्यवस्था बन्द गरिएको छ। अब अनुगमन कार्य सीमित, व्यवस्थित र आधिकारिक प्रतिनिधिमार्फत मात्र हुने बोर्डले जनाएको छ।
बोर्डको यो निर्णयले परीक्षा केन्द्रलाई शान्त, मर्यादित र विद्यार्थीमैत्री वातावरणमा सञ्चालन गर्न मद्दत पुग्ने अपेक्षा गरिएको छ।
