अमेरिकी राष्ट्रपति डोनाल्ड ट्रम्पले अमेरिकी कम्पनीको नेतृत्वमा भेनेजुएलाको पेट्रोलियम पदार्थ उत्खनन् कार्यलाई पुनर्जीवित गर्ने सम्भावनाबारे छलफल थालेका छन् ।
ह्वाइट हाउसमा दर्जनौँ तेल कम्पनीका मालिक तथा शीर्ष कार्यकारीहरूलाई बोलाएर गरिएको भेटमा अमेरिकाले स्पष्टसँग आफ्नै भूमिको श्रोत साधन बेचबिखन गरे झैँ भेनेजुयलाको पेट्रोलियम पदार्थ उत्खननका निम्ति निर्देशन दिएको बताइन्छ ।
समाचार संस्था रोयटर्सका अनुसार वासिङ्टनमा भएको उक्त बैठकमा सेभरन,एक्सन मोबिल र कोनोकोफिलिप्सजस्ता ठूला अमेरिकी तेल कम्पनीका मालिक तथा सिइओहरु थिए । त्यसैगरी बैठकमा अमेरिकी विदेशमन्त्री मार्को रुबियो,ऊर्जामन्त्री क्रिस राइट र आन्तरिकमन्त्री डग बर्गम पनि देखिए ।
छलफलमा भेनेजुयलाको तेल पूर्वाधारमा लगानी,उत्पादन बृद्धि तथा अमेरिकी कम्पनीहरूको सुरक्षा र लगानी वातावरणबारे विस्तृत छलफल भएको बताइएको छ ।
राष्ट्रपति ट्रम्पले अर्को देश भेनेजुयलामा लगानी गर्न इच्छुक कम्पनीहरूलाई ‘पूर्ण सुरक्षा र सुनिश्चितता’को आश्वासन दिएको अन्तर्राष्ट्रिय सञ्चारमाध्यमहरूले जनाएका छन् ।
यद्यपि विगतको राजनीतिक अस्थिरता, सम्पत्ति जफत र कानुनी अनिश्चितताका कारण कतिपय कम्पनीले चासो देखाउन सकेका छैनन् । बैठकमा तत्काल ठोस लगानी प्रतिबद्धता प्राप्त नभएको समाचारमा उल्लेख छ ।
