जिल्ला प्रशासन कार्यालय डोल्पाको आयोजना तथा शे–फोक्सुण्डो गाउँपालिकाको सहकार्यमा नेपाल–चीन सीमा क्षेत्रका करिब २०० जना स्थानीय बासिन्दालाई प्रस्थान तथा प्रवेशपत्र वितरण गरिएको छ ।
नेपाल–चीन सीमा क्षेत्रमा बसोबास गर्ने नागरिकको आवतजावतलाई सहज र व्यवस्थित बनाउने उद्देश्यले प्रस्थान तथा प्रवेशपत्र वितरण गरिएको हो ।
सीमा क्षेत्रमा बसोबास गर्ने स्थानीय नागरिकलाई दैनिक आवश्यक काम, व्यापार–व्यवसाय तथा सामाजिक गतिविधिका लागि सीमावर्ती क्षेत्रमा आवतजावत गर्नुपर्ने भएकाले प्रवेश तथा प्रस्थानपत्र महत्वपूर्ण मानिन्छ ।
जिल्ला प्रशासन कार्यालयको समन्वयमा गाउँपालिकाको सहकार्यमा आयोजित कार्यक्रममा सीमा क्षेत्रका स्थानीय बासिन्दाको आवश्यक विवरण संकलन तथा प्रक्रिया पूरा गरी करिब २०० जनालाई प्रस्थान तथा प्रवेशपत्र उपलब्ध गराइएको हो ।
लामो दूरी र भौगोलिक कठिनाइका कारण जिल्ला सदरमुकामसम्म पुगेर सेवा लिनुपर्ने बाध्यता रहेका स्थानीयका लागि गाउँमै सेवा उपलब्ध गराउँदा सहज भएको स्थानीयको भनाइ छ ।
डोल्पाको उत्तरी क्षेत्रमा चीनसँग जोडिएका सीमावर्ती बस्तीका नागरिकको जीवनयापन सीमापारि हुने आवतजावतसँग समेत जोडिएको छ । विशेषगरी सीमावर्ती क्षेत्रमा रहेका नागरिकले दैनिक उपभोग्य सामग्री, व्यापारिक गतिविधि तथा आफन्तसँगको भेटघाटलगायतका कामका लागि नियमित रूपमा सीमावर्ती क्षेत्रसम्म पुग्नुपर्ने अवस्था रहँदै आएको छ ।
प्रस्थान तथा प्रवेशपत्र वितरणले सीमावर्ती क्षेत्रका नागरिकको आवतजावतलाई कानुनी तथा प्रशासनिक रूपमा व्यवस्थित गर्न सहयोग पुग्ने अपेक्षा गरिएको छ ।
स्थानीय तह र जिल्ला प्रशासनबीचको समन्वयबाट सेवा प्रवाहलाई नागरिकको पहुँचसम्म पु¥याउन सकिने उदाहरणका रूपमा समेत यस कार्यक्रमलाई हेरिएको छ ।
शे–फोक्सुण्डो गाउँपालिकाले सीमा क्षेत्रका नागरिकलाई आवश्यक प्रशासनिक सेवा सहज रूपमा उपलब्ध गराउन आगामी दिनमा पनि जिल्ला प्रशासन कार्यालयसँग समन्वय र सहकार्यलाई निरन्तरता दिने जनाएको छ ।
कार्यक्रममा स्थानीय जनप्रतिनिधि, प्रशासनका कर्मचारी तथा सम्बन्धित क्षेत्रका नागरिकको सहभागिता रहेको थियो ।
