काठमाडौं । भारतको राजधानी नयाँदिल्लीमा आजदेखि सुरु भएको १८औँ ब्रिक्स शिखर सम्मेलनमा सहभागी हुन विभिन्न मुलुकका राष्ट्राध्यक्ष, मन्त्री तथा अन्तर्राष्ट्रिय संस्थाका उच्च अधिकारीहरू नयाँदिल्ली पुगेका छन् ।
भारतीय विदेश मन्त्रालयका अनुसार रुसका राष्ट्रपति भ्लादिमीर पुटिन, चीनीयाँ राष्ट्रिपति सिजिनपिङ, फिलिपिन्सका राष्ट्रपति फर्डिनान्ड आर. मार्कोस जुनियर, इन्डोनेसियाका राष्ट्रपति प्रबोवो सुबियान्तो, क्युबाका विदेशमन्त्री ब्रुनो रोड्रिगेज पारिल्ला, थाइल्यान्डका उपप्रधान तथा विदेशमन्त्री सिहासाक फुआङ्केटकियो, बुरुण्डीका राष्ट्रपति एभारिस्त न्दायिशिमिये तथा विश्व व्यापार संगठन (डब्लुटिओ) की महानिर्देशक न्गोजी ओकोन्जो–इवेला लगायत नेताहरु नयाँदिल्ली आइपुगेका हुन् ।
विदेश मन्त्रालयका प्रवक्ता रणधीर जायसवालले सामाजिक सञ्जाल एक्समार्फत उनीहरूलाई स्वागत गर्दै सम्मेलनले द्विपक्षीय सम्बन्धलाई थप सुदृढ बनाउने र ग्लोबल साउथका साझा प्राथमिकतालाई अघि बढाउने विश्वास व्यक्त गरेका छन् ।
आसियानदेखि अफ्रिकी युनियनसम्मको सहभागिता
फिलिपिन्सका राष्ट्रपति मार्कोस सन् २०२६ का आसियान अध्यक्षको हैसियतमा सम्मेलनमा सहभागी भएका हुन् । भारतले फिलिपिन्सलाई आफ्नो ‘एक्ट इस्ट’ नीतिको महत्वपूर्ण साझेदार मान्दै हिन्द–प्रशान्त क्षेत्रमा व्यापार, सामुद्रिक सुरक्षा र क्षेत्रीय सम्पर्क विस्तारमा सहकार्य बढाउने लक्ष्य दोहोर्याएको छ ।
इन्डोनेसियाका राष्ट्रपति सुबियान्तोसँग विकास र समृद्धिमा केन्द्रित सहकार्यलाई अघि बढाउने भारतको अपेक्षा रहेको विदेश मन्त्रालयले जनाएको छ । थाइल्यान्डसँगको व्यापक रणनीतिक साझेदारीलाई अझ गहिरो बनाउने उद्देश्यले उपप्रधान तथा विदेशमन्त्री सिहासाकको भ्रमण महत्वपूर्ण हुने बताइएको छ ।
क्युबा, अफ्रिकी युनियन र डब्लुटिओको उपस्थिति
क्युबाका विदेशमन्त्री पारिल्लाको सहभागितालाई भारतले ग्लोबल साउथका साझा एजेन्डामा सहकार्य विस्तारको अवसरका रूपमा लिएको छ । बुरुण्डीका राष्ट्रपति न्दायिशिमिये अफ्रिकी युनियनको प्रतिनिधित्व गर्दै सम्मेलनमा सहभागी भएका छन् ।
यस्तै, डब्लुटिओकी महानिर्देशक न्गोजी ओकोन्जो–इवेलाको उपस्थितिले समावेशी व्यापार, विकास र विश्व व्यापार प्रणाली सुधारसम्बन्धी छलफललाई थप बल पुग्ने भारतको अपेक्षा छ ।
‘ब्रिक्स २०२६’ को केन्द्रमा विकास र स्थायित्व
भारतले सेप्टेम्बर १२ र १३ मा आयोजना गरेको १८औँ ब्रिक्स शिखर सम्मेलनको मूल विषय ‘बिल्डिङ फर रेजिलिएन्स, इनोभेसन, कोअपरेसन एन्ड सस्टेनेबिलिटी’ रहेको छ ।
भारतको अध्यक्षतामा आयोजना भएको सम्मेलनले विकास, दिगोपन, नवप्रवर्तन, जलवायु कार्य, ऊर्जा सुरक्षा, वित्तीय स्थायित्व र विश्व संस्थागत सुधारका विषयमा सदस्य राष्ट्रबीच सहकार्य विस्तार गर्ने लक्ष्य राखेको छ ।
हाल ब्रिक्समा ब्राजिल, चीन, इजिप्ट, इथियोपिया, भारत, इन्डोनेसिया, इरान, रुस, साउदी अरेबिया, दक्षिण अफ्रिका र संयुक्त अरब इमिरेट्स गरी ११ सदस्य राष्ट्र रहेका छन् । विश्व अर्थतन्त्रमा बढ्दो विभाजन, प्रविधिगत परिवर्तन, भू–राजनीतिक अनिश्चितता र जलवायु संकटबीच विस्तारित ब्रिक्सलाई उदीयमान अर्थतन्त्रहरूको साझा आवाज र ग्लोबल साउथका हित प्रवद्र्धन गर्ने महत्वपूर्ण बहुपक्षीय मञ्चका रूपमा हेरिएको छ । एएनआई
