आज भक्तपुरमा बौद्ध धर्मावलम्बी नेवार समुदायले पञ्चदान पर्व धूमधामका साथ मनाइरहेका छन्। हरेक वर्ष भाद्र कृष्ण त्रयोदशी (गुँलागा त्रयोदशी) का दिन यो महत्त्वपूर्ण पर्व मनाइन्छ।
पञ्चदान पर्व बौद्ध धर्मावलम्बीको ठुलो र ऐतिहासिक पर्व मानिन्छ। यस अवसरमा भक्तपुरका पाँच प्रमुख बिहारबाट निस्किएका दिपङ्कर बुद्धलाई दिनभर नगरका विभिन्न स्थान तथा बौद्ध बिहारमा परिक्रमा गराइँदैछ।
समारोहमा सहभागीहरूले रीतरिवाज अनुसार बुद्धलाई पूजा गर्ने र सांस्कृतिक कार्यक्रममा समेत सहभागी हुने परम्परा रहेको छ। यस पर्वले नेवार समुदायको धार्मिक र सांस्कृतिक धरोहरलाई जगेर्ना गर्दै आएको छ।
