पूर्वराजा ज्ञानेन्द्र शाहले दशैंको अवसरमा सार्वजनिक शुभकामना सन्देशमा नयाँ पुस्ताका आकांक्षा र चाहनालाई राज्य प्रणालीमा समावेश गर्न आवश्यक रहेको स्पष्ट पारेका छन्।
आइतबार जारी सन्देशमा उनले युवालाई नेपालको भविष्यको स्तम्भ भएको बताएका छन्। युवामा निहित देशभक्ति, ऊर्जा र नवप्रवर्तनशील सोचले मात्र राष्ट्रलाई बलियो, समृद्ध र आत्मनिर्भर बनाउन सकिने उनको भनाइ छ।
पूर्वराजाले भने, “हाम्रो देशको ऐना हेर्दा आफ्नै अनुहार देख्नुपर्छ। हाम्रो शासनको ठूलो भागले नष्ट, तोडफोड र जलाउने काममा लागेको थियो। अब नष्ट गर्न होइन, निर्माणमा ध्यान दिनुपर्छ।”
साथै उनले सत्य, वरिष्ठ नेताहरूको सम्मान, अनुशासन र मर्यादाको कदर गर्ने तथा राष्ट्रप्रेम गर्ने राष्ट्रिय मानसिकताको आवश्यकता रहेकोमा जोड दिएका छन्।
पूर्वराजाले थपे, “जे भयो, भयो। जे हुनु हुँदैन थियो, भयो। अब नयाँ पुस्ता, आउँदै गरेको नयाँ युग, आशा, विश्वास र भरोसासाथ अगाडि बढ्नुपर्छ।”
