रूसका राष्ट्रपति भ्लादिमिर पुटिनले यूक्रेनमा जारी संघर्ष अन्त्य गर्न अमेरिकाले तयार पारेको शान्ति योजना “भविष्यका समझदारीको आधार बन्न सक्छ” भनेका छन्। पुटिनले यसअघि अमेरिकी विशेष प्रतिनिधि स्टिभ विटकफको मस्को भ्रमण आउने अपेक्षा रहेको पनि जनाएका छन्।
तर, पुटिनले चेतावनी दिँदै भने, “यदि यूक्रेनी सेना कब्जा गरेका क्षेत्रबाट फिर्ता फर्किएन भने, हामी सैन्य माध्यमबाट अझ बढी भूभाग कब्जा गर्नेछौँ।”
पुटिनले मस्कोमा सञ्चारकर्मीहरूसँग कुरा गर्दै, क्रेमलिन “गम्भीर छलफलका लागि तयार” रहेको बताए। तर उनले जोड दिए, संघर्ष तब मात्र समाप्त हुनेछ जब यूक्रेनी सेनाले कब्जा गरेका क्षेत्र खाली गर्नेछ।
रूसले यूक्रेनको करिब २० प्रतिशत भूभागमा कब्जा जमाएको छ, जसमा लुहान्स्क क्षेत्र पूरै र डोनेट्स्क, खेरसन र जापोरिज्जिया क्षेत्रका केही भागहरू पर्दछन्। पुटिनका अनुसार, रूसले यी चार क्षेत्र पूर्ण रूपमा बुझ्ने माग राखेको छ।
यद्यपि, अमेरिकी–आधारित संघर्ष अनुगमन संस्था ‘इन्स्टिच्युट फर द स्टडी अफ वार’ का अनुसार, रूसले छिट्टै डोनेट्स्कको बाँकी भाग कब्जा गर्ने सम्भावना तत्काल छैन।
यूक्रेन र युरोपेली साझेदारहरूले क्षेत्रीय सिमा सम्झौता गर्न नचाहेको स्पष्ट गर्दै आएका छन्। पुटिनले भने, “मलाई नयाँ शान्ति योजनाको मस्यौदा छलफलका लागि विटकफको मस्को आगमनको अपेक्षा छ।”
उनले अमेरिकाबाट आएको योजनाको जानकारी पाएको उल्लेख गर्दै भने, “यो योजना भविष्यका समझदारीका लागि आधार बन्न सक्छ।”
यसैबीच, यूक्रेन र युरोपेली अधिकारीहरूले अमेरिकी २८-बुँदे शान्ति योजनामा केही आपत्ति जनाइसकेका छन्, जसमा रूसको माग अनुसार यूक्रेनले आफ्नो सेना घटाउने र NATO मा नजोडिने सर्त समावेश थियो।
