भारतबाट प्राप्त नयाँ खरिद मूल्यअनुसार नेपाल आयल निगमले डिजेल र मट्टितेलको मूल्य प्रतिलिटर १ रुपैयाँले घटाएको छ भने हवाई इन्धनको मूल्यमा भने वृद्धि गरेको छ। नयाँ मूल्य आइतबार राति १२ बजेपदेखि लागू भएको छ।
भारतबाट डिजेलको खरिद मूल्य प्रतिलिटर रु. १.४४ ले घटेर आएपछि निगमले उपभोक्ताका लागि प्रतिलिटर १ रुपैयाँले सस्तो पारेको हो। नयाँ दरअनुसार पहिलो वर्गमा १४३.५०, दोस्रो वर्गमा १४५.०० र तेस्रो वर्गमा १४६.०० रुपैयाँ प्रतिलिटर कायम भएको छ।
यसैबीच, भारतबाट मूल्य बढेर आएको कारण आन्तरिक उडानमा प्रयोग हुने हवाई इन्धन प्रतिलिटर ५.६२ रुपैयाँले महँगो भएपछि उपभोक्ता मूल्य प्रतिलिटर ६ रुपैयाँले बढाइएका छन्। यससँगै आन्तरिक हवाई इन्धनको दर १२८ रुपैयाँबाट १३४ रुपैयाँ पुगेको छ। अन्तर्राष्ट्रिय उडान (काठमाडौँका लागि) प्रयोजनका लागि प्रति किलोलिटर ४२ अमेरिकी डलरले मूल्य वृद्धि गरिएको निगमले जनाएको छ।
पेट्रोल र एलपी ग्यासको मूल्य भने यथावत राखिएको छ।
