रिलायन्स स्पीनिङ मिल्सले बुक बिल्डिङ्ग प्रक्रियामार्फत निष्कासन गरेको साधारण शेयर (आईपीओ) सम्बन्धी विषयमा छानबिन गर्न नेपाल धितोपत्र बोर्डले औपचारिक समिति गठन गरेको छ। लगानीकर्ताको चासो बढिरहेको यस विषयमा पारदर्शिता सुनिश्चित गर्ने उद्देश्यले बोर्डले तीन सदस्यीय छानबिन समिति बनाएको हो।
नेपाल धितोपत्र बोर्डका सदस्य विनोद कुमार भट्टराईको संयोजकत्वमा गठित समितिमा बोर्डकै सदस्य आनन्द राज शर्मा वाग्ले र पिताम्बर भण्डारी सदस्य रहेका छन्। आवश्यक परेमा समितिले अन्य व्यक्तिलाई पनि आमन्त्रण गर्न सक्ने व्यवस्था गरिएको बोर्डले जनाएको छ। बोर्डको आजको निर्णयअनुसार समिति गठन गरिएको हो।
समितिलाई १५ दिनभित्र छानबिन पूरा गरी प्रतिवेदन नेपाल धितोपत्र बोर्डमा पेस गर्न समयसीमा तोकिएको छ। छानबिनको दायरा रिलायन्स स्पीनिङ मिल्सको शेयर बुक बिल्डिङ्ग प्रक्रियाबाट निष्कासन गर्दा भएका काम–कारबाही तथा त्यससँग सम्बन्धित अन्य विषयहरूमा केन्द्रित रहने बताइएको छ।
यसअघि अर्थ मन्त्रालयले रिलायन्सको आईपीओ निष्कासन प्रक्रियाबारे छानबिन गर्न आवश्यक देखिएको भन्दै नेपाल धितोपत्र बोर्डलाई पत्राचार गरेको थियो। मन्त्रालयले बुक बिल्डिङ्ग प्रक्रियाबाट शेयर निष्कासन गर्दा भएका गतिविधि र त्यससँग सम्बन्धित विषयहरूमा आफ्नो ध्यानाकर्षण भएको उल्लेख गर्दै बोर्डलाई आवश्यक छानबिन र कारबाहीका लागि आग्रह गरेको थियो।
मन्त्रालयको पत्रमा विभिन्न सञ्चार माध्यममा प्रकाशित समाचारहरू तथा मन्त्रालयमा प्राप्त उजुरीसमेतका आधारमा छानबिन गर्न निर्देशन दिइएको छ। ‘संलग्न उजुरीमा उठाइएका विषयहरू सम्बन्धमा छानबिन गरी आवश्यक कारबाही गर्नुहुन र सोको जानकारी मन्त्रालयमा पठाउनु,’ पत्रमा उल्लेख छ।
अर्थ मन्त्रालयका अनुसार उक्त पत्र राजस्व सचिव स्तरको निर्णयअनुसार पठाइएको हो। पत्रमा मन्त्रालयका शाखा अधिकृत नरेन्द्र कुमार कार्कीको हस्ताक्षर रहेको छ।
धितोपत्र बजारप्रति लगानीकर्ताको विश्वास अभिवृद्धि गर्ने लक्ष्यसहित गठित यस छानबिन समितिको प्रतिवेदनपछि रिलायन्स स्पीनिङ मिल्सको आईपीओ प्रक्रियाबारे स्पष्ट निष्कर्ष आउने अपेक्षा गरिएको छ।
