चोटका कारण अन्तर्राष्ट्रिय खेल गुमाएका काई हाभर्ट्ज र एज्री कोन्सा प्रिमियर लिगमा लिड्स युनाइटेडविरुद्ध आर्सनलको सुरुआती टोलीमा परेका छन्।
अन्तर्राष्ट्रिय ब्रेकका क्रममा जर्मनीका हाभर्ट्ज नेदरल्यान्ड्सविरुद्धको खेलमा ३० मिनेटपछि मैदानबाट बाहिरिएका थिए। त्यसपछि उनी थप उपचारका लागि आर्सनल फर्किएका थिए। यस्तै, इंग्ल्यान्डका कोन्साले स्पेन र क्रोएसियाविरुद्ध खेले पनि चेकियाविरुद्धको खेलअघि चोटका कारण राष्ट्रिय टोली छाडेका थिए।
आर्सनलका प्रशिक्षक मिकेल आर्टेटाले शुक्रबार पत्रकार सम्मेलनमा दुवै खेलाडीको फिटनेसबारे जानकारी दिएका थिए।
उनले हाभर्ट्जलाई मांसपेशीमा चोट लागेको र जर्मनीको टोलीसँग समन्वय गरेर उनलाई क्लब फर्काइएको बताए। कोन्सालाई पनि केही समस्या रहेको र इंग्ल्यान्डको टोलीसँग यस विषयमा राम्रो समन्वय भएको उनले जानकारी दिए।
हाभर्ट्जको चोटका कारण स्विडेनका लागि नेसन्स लिगमा चार गोल गरेका भिक्टर ग्योकेरेसले सुरुआती टोलीमा मौका पाउने अनुमान गरिएको थियो।
तर उनी लिड्सविरुद्ध पनि बेन्चमा छन्। यससँगै प्रिमियर लिगमा पहिलोपटक सुरुआती ११ बाट खेल्ने उनको प्रतीक्षा लम्बिएको छ।
इंग्ल्यान्डका पछिल्ला खेल गुमाएका डेक्लान राइस पनि आर्सनलको सुरुआती टोलीमा फर्किएका छन्। ब्राइटनविरुद्धको अघिल्लो लिग खेलमा बेन्चमा रहेका माइल्स लुइस–स्केलीले पनि सुरुआती ११ मा स्थान बनाएका छन्
चोटका कारण क्रिस्टोस जोलिस उपलब्ध नभएपछि नोनी माडुकेले एबेरेची एजेभन्दा अघि बायाँ विङमा खेल्ने अवसर पाएका छन्।
अन्तर्राष्ट्रिय ब्रेकपछि पुनः सुरु भएको प्रिमियर लिगमा आर्सनलले घरेलु मैदान एमिरेट्समा लिड्सको सामना गरिरहेको छ। ब्राइटनसँग पछिल्लो खेलमा ०–३ ले पराजित भएको आर्सनल उक्त हार बिर्साउँदै पुनरागमन गर्ने लक्ष्यमा छ।
लिड्स भने यस सिजन लिगमा अपराजित रहेका ५ टोलीमध्ये एक हो। आर्सनललाई उसकै मैदानमा हराउँदै शीर्ष तीनमा उक्लने सम्भावना बलियो बनाउने लक्ष्य लिड्सको छ।
