नेपाल कृषि विकास बैंक लिमिटेडले काठमाडौँ जिल्ला अदालतलाई आधुनिक कार्यालय उपकरण हस्तान्तरण गरेको छ। यस सहयोगमा उन्नत कम्प्युटर, प्रिन्टर र अन्य आवश्यक पेरिफेरल उपकरणहरू समावेश छन्। यो पहल बैंकको सामाजिक उत्तरदायित्व (CSR) अन्तर्गत गरिएको हो।
हस्तान्तरण समारोह पुस ६, २०८२ मा अदालत परिसरमै सम्पन्न भएको थियो। बैंकका उप–महाप्रबन्धक सुशील हमागाई, वरिष्ठ शाखा प्रबन्धक महेश्वर मारहट्टा र ध्रुव पौडेल, तथा वरिष्ठ शाखा अधिकृत गीता नेपाल शर्मा उपस्थित थिए। अदालततर्फ उप–सचिव तिर्थराज भट्टराई र शाखा अधिकृत सूर्यप्रसाद दाहालले उपकरण ग्रहण गरे।
यो सहयोग भद्र २४ का घटनापछि अदालतको संरचनामा परेको क्षति र प्रशासनिक चुनौतीलाई ध्यानमा राखेर गरिएको हो। आगलागीका कारण महत्वपूर्ण अभिलेख नष्ट हुँदा अदालतको दैनिक कार्य र न्यायिक सेवा अस्थायी रूपमा प्रभावित भएको थियो। बैंकले CSR बजेटबाट तत्काल सहयोग प्रदान गर्दै अदालतलाई प्रविधिमैत्री सेवा प्रणालीमा सुधार गर्न मद्दत गरेको छ।
सहयोगले अदालतमा दस्तावेजीकरण, प्रिन्टिंग, डाटा सुरक्षा, दक्षता र ई–फाइलिङ प्रणालीको कार्यान्वयनमा सुधार ल्याउने अपेक्षा गरिएको छ। बैंकले भविष्यमा पनि यस्ता सार्वजनिक हितका परियोजनाहरूमा सहयोग जारी राख्ने प्रतिबद्धता व्यक्त गरेको छ।
