नेपाल राष्ट्र बैंकले कोशी प्रदेशमा गरेको विशेष अध्ययन अनुसार स्टार्टअप उद्यममा न्यूनतम २१ वर्षदेखि अधिकतम ७० वर्षका उद्यमीहरू संलग्न छन्। अध्ययनले यस क्षेत्रमा कुल लगानी रु २ अर्ब ५६ करोड रहेको र त्यसमा ३८.७ प्रतिशत ऋण तथा ६१.३ प्रतिशत स्वपुँजी रहेको देखाएको छ।
उमेर समूहअनुसार २१–३५ वर्षका उद्यमी ३९.३%, ३६–५० वर्षका ४४.४%, र ५०–७० वर्षका १६.२% रहेका छन्। २१–३५ वर्ष समूहमा सबैभन्दा बढी उद्यमी सूचना प्रविधि क्षेत्रमा (७३.३%) संलग्न छन् भने सबैभन्दा कम कृषि क्षेत्रमा (२१.२%) छन्।
३६–५० वर्षका उद्यमी मुख्यतया कृषि क्षेत्रमा केन्द्रित (अधिकतम) छन् भने सूचना प्रविधिमा कम (२६.७%) संलग्न छन्। ५०–७० वर्ष समूहमा सबैभन्दा बढी पर्यटन क्षेत्रमा उद्यमी छन् (२७.३%), तर सूचना प्रविधिमा यस उमेर समूहको कुनै संलग्नता छैन।
अध्ययनका लागि औद्योगिक व्यावसाय विकास प्रतिष्ठानमा स्टार्टअप कर्जाका लागि आवेदन दर्ता गरेका र ‘सर्टलिष्ट’ भएका १६० उद्यमको तथ्याङ्क प्रयोग गरिएको हो। सहभागी उद्यमहरू कृषि तथा वनजन्य, उत्पादनमूलक, सेवामूलक, पर्यटन र सूचना प्रविधि क्षेत्रका रहेका छन्। त्यसमा कृषि तथा वनजन्य ४१.३%, उत्पादनमूलक १८.१%, सेवामूलक १७.५%, पर्यटन १३.८% र सूचना प्रविधि ९.४% रहेको अध्ययनले देखाएको छ।
अध्ययनबाट युवापुस्ताले डिजिटल र प्रविधि क्षेत्रमा बढी रुचि राखेको देखिन्छ भने मध्य उमेर समूहका उद्यमी कृषिमा, र वृद्ध उमेर समूहका उद्यमी पर्यटनमा बढी संलग्न छन्। यसले कोशी प्रदेशमा उमेर अनुसार व्यवसायिक प्राथमिकता र लगानी प्रवृत्तिमा स्पष्ट भिन्नता देखाएको छ।
