निर्माणाधीन कोहलपुर–सुर्खेत १३२ केभी प्रसारण लाइन आयोजना कार्यान्वयनको अन्तिम चरणमा पुगेको छ । यही माघ २० गतेभित्र प्रसारण लाइन चार्जिङ गर्ने लक्ष्यसहित तीव्र गतिमा काम भइरहेको आयोजनाले जनाएको छ ।
आयोजना प्रमुख रवि चौधरीका अनुसार हाल करिब ५०० मिटर मात्र तार तान्न बाँकी रहेको छ । छ वर्षअघि करिब ७० करोड रुपैयाँको लागतमा सुरु गरिएको यो आयोजनाले शतप्रतिशत भौतिक प्रगति हासिल गरिसकेको छ ।
आयोजनाअन्तर्गत आगामी एक साताभित्र परीक्षण कार्य सम्पन्न गर्ने र त्यसपछि १५ दिनभित्र विद्युत् प्रवाह सुरु गर्ने तयारी गरिएको छ । प्रसारण लाइन सञ्चालनमा आएपछि कोहलपुर–सुर्खेत क्षेत्रको विद्युत् आपूर्ति थप भरपर्दो हुने र भविष्यमा औद्योगिक तथा शहरी विकासमा टेवा पुग्ने अपेक्षा गरिएको छ ।
सम्बन्धित निकायका अनुसार निर्धारित समयमै आयोजना सम्पन्न गरी विद्युत् प्रणालीलाई मजबुत बनाउने दिशामा काम केन्द्रित गरिएको छ ।
