काठमाडौँ । याम्बालिङ्ग हाइड्रोपावर लिमिटेडले आयोजना प्रभावित क्षेत्रका स्थानीय बासिन्दाका लागि निष्कासन गरेको साधारण शेयर (आईपीओ) सफलतापूर्वक बाँडफाँड गरेको छ।
कम्पनीको धितोपत्र निष्कासन तथा बिक्री प्रबन्धक मुक्तिनाथ क्यापिटलले आइतबार एक कार्यक्रमका बीच आईपीओ बाँडफाँड सम्पन्न गरेको हो। कम्पनीले गत चैत ८ गतेदेखि २३ गतेसम्म आयोजना प्रभावित स्थानीयका लागि प्रतिकित्ता १०० रुपैयाँ अंकित मूल्यका कुल ७ लाख कित्ता शेयर बिक्री खुला गरेको थियो।
उक्त अवधिमा रीतपूर्वक आवेदन दिएका सबै योग्य आवेदकहरूलाई नियमानुसार शेयर बाँडफाँड गरिएको क्यापिटलले जनाएको छ। यस आईपीओमा स्थानीय बासिन्दाले न्यूनतम १० कित्तादेखि अधिकतम ७ हजार कित्तासम्म आवेदन दिन पाउने व्यवस्था गरिएको थियो।
बाँडफाँडको नतिजा बिक्री प्रबन्धक मुक्तिनाथ क्यापिटलको आधिकारिक वेबसाइट तथा सम्बन्धित कम्पनीका माध्यमबाट हेर्न सकिने व्यवस्था गरिएको छ। कम्पनीका अनुसार आईपीओ प्रक्रिया पारदर्शी र व्यवस्थित रूपमा सम्पन्न भएको छ, जसले आयोजना प्रभावित क्षेत्रका स्थानीयमा लगानी अवसर विस्तार गर्न सहयोग पुगेको छ।
