काठमाडौं । महानगरीय प्रहरी प्रभाग कोटेश्वर क्षेत्रमा शान्ति सुरक्षा, ट्राफिक व्यवस्थापन र समुदाय–प्रहरी सहकार्यलाई थप प्रभावकारी बनाउने अभियानले गति लिएको स्थानीयवासीको अनुभूति छ। व्यस्त व्यापारिक तथा आवागमनको केन्द्र मानिने कोटेश्वर क्षेत्रमा सडक सुरक्षा, नियमित ट्राफिक अनुगमन, सवारी चेकजाँच र जनचेतनामूलक कार्यक्रमलाई प्राथमिकतामा राख्दै प्रहरी सक्रिय रूपमा परिचालित भएको छ।
विशेषगरी सडक दुर्घटना न्यूनीकरण, ट्राफिक नियमको पालना, सार्वजनिक सुरक्षा र समुदायसँगको प्रत्यक्ष संवादलाई जोड दिँदै प्रहरीले विभिन्न सचेतनामूलक कार्यक्रम सञ्चालन गरिरहेको छ। विद्यालय, स्थानीय संघसंस्था, यातायात व्यवसायी तथा सर्वसाधारणसँगको सहकार्यमार्फत सुरक्षित सडक र जिम्मेवार नागरिकको अवधारणालाई व्यवहारमा उतार्ने प्रयास भइरहेको छ।
प्रहरीले ‘समुदाय–प्रहरी साझेदारी’ केवल नारामा सीमित नभई व्यवहारमा कार्यान्वयन हुनुपर्ने मान्यताका साथ स्थानीयवासीसँगको विश्वासलाई सुदृढ बनाउन विशेष जोड दिएका छन्। प्रहरी केवल अपराध भएपछि पुग्ने निकाय होइन, अपराध हुन नदिन, जनचेतना अभिवृद्धि गर्न र नागरिकसँग सहकार्य गर्दै सुरक्षित समाज निर्माण गर्ने संस्था हो भन्ने सन्देश उनले आफ्नो कार्यशैलीमार्फत स्थापित गर्न खोजिरहेका छन्।
स्थानीयका अनुसार कोटेश्वर क्षेत्रमा पछिल्लो समय ट्राफिक व्यवस्थापन, सार्वजनिक अनुशासन, नियमित निगरानी तथा प्रहरीको जनमैत्री उपस्थितिले सकारात्मक वातावरण सिर्जना हुन थालेको छ।
