काठमाडौं । नेपाली कांग्रेसको १५औँ महाधिवेशनअन्तर्गत पदाधिकारीको मतगणनाबाट उपसभापति र महामन्त्रीका विभिन्न पदमा विजयी उम्मेदवारको टुंगो लागेको छ। खुला उपसभापतिमा डा. चन्द्रकान्त भण्डारी र इन्जिनियर मधु आचार्य विजयी भएका छन् भने खुला महामन्त्रीमा प्रदीप पौडेल र उदयशमशेर राणा निर्वाचित भएका छन्।
सार्वजनिक मतपरिणामअनुसार उपसभापति खुलातर्फ डा. भण्डारीले सर्वाधिक ३ हजार ७३५ मत प्राप्त गर्दै विजयी भएका हुन्। अर्का विजयी उम्मेदवार आचार्यले २ हजार ३४२ मत प्राप्त गरे। उक्त पदका उम्मेदवार गोविन्द भट्टराईले १ हजार ७५२, सुरेन्द्रराज पाण्डेले १ हजार ६७३, धनराज गुरुङले १ हजार ५९६, दीपक गिरीले ९२३ र प्रा. डा. चन्द्रमोहन यादवले ७६० मत प्राप्त गरे।
उपसभापतिको समावेशी एक पदमा विनोदकुमार चौधरी विजयी भएका छन्। उनले १ हजार ७४५ मत प्राप्त गर्दै प्रतिस्पर्धीहरूलाई पछि पारे। उनका प्रतिस्पर्धी जीवन परियारले १ हजार ६५८, फरमुल्लाह मन्सुरले १ हजार १४४, सीता गुरुङले १ हजार ११२ र रञ्जित कर्णले ५६२ मत प्राप्त गरे।
महामन्त्री खुलातर्फ प्रदीप पौडेल सर्वाधिक ४ हजार १९४ मत प्राप्त गर्दै विजयी भएका छन्। अर्का विजयी उम्मेदवार उदयशमशेर राणाले २ हजार ३३० मत प्राप्त गरे। महामन्त्री पदमा डा. सुनिलकुमार शर्माले २ हजार २५७, गुरुराज घिमिरेले १ हजार ५१३, अमरसिंह पुन मगरले १ हजार १२५, नैनसिंह महरले १ हजार १३४, शंकर तिवारीले १२३ र डा. सन्तोष उपाध्यायले ९७ मत प्राप्त गरे।
महामन्त्री महिलातर्फ डा. डिला संग्रौला (पन्त) विजयी भएकी छन्। उनले ३ हजार ११८ मत प्राप्त गर्दै उक्त पदमा निर्वाचित भएकी हुन्। उनकी प्रतिस्पर्धी महालक्ष्मी उपाध्याय (डिना) ले २ हजार ८६४ र रीता खनालले ८०४ मत प्राप्त गरिन्।
सार्वजनिक मतपरिणामसँगै खुला उपसभापतिमा डा. चन्द्रकान्त भण्डारी र मधु आचार्य, समावेशी उपसभापतिमा विनोदकुमार चौधरी, खुला महामन्त्रीमा प्रदीप पौडेल र उदयशमशेर राणा तथा महिला महामन्त्रीमा डा. डिला संग्रौला निर्वाचित भएका छन्।
कांग्रेसको १५औँ महाधिवेशनबाट नेतृत्व चयनको प्रक्रियामा पदाधिकारीका विभिन्न पदको मतपरिणाम सार्वजनिक भएसँगै पार्टीको आगामी नेतृत्व र संगठन सञ्चालनमा निर्वाचित पदाधिकारीको भूमिका महत्वपूर्ण हुने देखिएको छ।
