पाकिस्तानी राजदूतद्वारा सुदूरपश्चिमका प्रशिक्षक मिसबाहलाई रात्रिभोज

  • Clock icon
    २०८३ कार्तिक ३०, सोमबार

नेपालका लागि पाकिस्तानका राजदूत मोहम्मद आमिर खानले नेपाल प्रिमियर लिग (एनपीएल) को तेस्रो संस्करणमा सुदूरपश्चिम रोयल्सका मुख्य प्रशिक्षक रहेका पाकिस्तानका पूर्वकप्तान मिसबाह उल हकको सम्मानमा काठमाडौंमा रात्रिभोज आयोजना गरेका छन् ।

आइतबार साँझ आयोजित उक्त कार्यक्रममा स्टार्टअप समिट नेपाल २०२६ की अध्यक्ष शोभा ज्ञवाली पनि सहभागी थिइन् । कार्यक्रममा नेपाल र पाकिस्तानबीचको मित्रता तथा आपसी सम्बन्ध सुदृढ बनाउन क्रिकेट र खेलकुदको भूमिकाबारे चर्चा भएको थियो ।

कार्यक्रमका क्रममा अध्यक्ष ज्ञवालीले नेपाली युवामाझ क्रिकेटप्रति बढ्दो आकर्षण र उत्साहलाई कसरी व्यावसायिक खेलमा रूपान्तरण गर्न सकिन्छ भन्ने विषयमा मिसबाहसँग जिज्ञासा राखेकी थिइन् । उनले नेपाली क्रिकेट खेलाडीको शारीरिक क्षमता, खेलकौशल, प्रशिक्षणको उपयुक्त उमेर तथा प्रतिभा पहिचानका लागि विद्यालय तहदेखि नै कस्ता कार्यक्रम सञ्चालन गर्न आवश्यक छ भन्नेबारे प्रश्न गरेकी थिइन् ।

जवाफमा मिसबाहले नेपाली युवा क्रिकेटप्रति निकै उत्साहित र आकर्षित रहेको उल्लेख गर्दै उनीहरूको क्षमता विकासका लागि शारीरिक तन्दुरुस्ती र प्राविधिक खेलकौशल दुवै पक्षमा ध्यान दिनुपर्ने बताएका थिए । उनले विद्यालय तहदेखि नै क्रिकेट प्रशिक्षण सुरु गर्ने, प्रतिभा पहिचान गर्ने र व्यवस्थित अभ्यास तथा प्रशिक्षणको अवसर उपलब्ध गराउने हो भने नेपाली क्रिकेटको विकासमा महत्त्वपूर्ण योगदान पुग्ने धारणा राखेका थिए ।

पाकिस्तानका सफल पूर्वकप्तानमध्ये एक मानिने मिसबाहले आफ्नो खेल जीवनमा राष्ट्रिय टोलीलाई महत्त्वपूर्ण सफलता दिलाएका थिए । उनको कप्तानीमा पाकिस्तानले सन् २०१२ को एसिया कप जितेको थियो । बंगलादेशमा भएको फाइनलमा पाकिस्तानले आयोजक टोलीलाई दुई रनले पराजित गरेको थियो । यो पाकिस्तानको दोस्रो एसिया कप उपाधि थियो ।

त्यस्तै, सन् २०१६ को अगस्टमा पाकिस्तान पहिलो पटक आईसीसी टेस्ट वरीयताको शीर्ष स्थानमा पुगेको थियो । सन् १९८८ मा वरीयता प्रणाली सुरु भएयता पाकिस्तानले टेस्ट क्रिकेटमा पहिलो पटक शीर्ष स्थान हासिल गरेको यो ऐतिहासिक उपलब्धि थियो । त्यसबेला मिसबाह पाकिस्तानका टेस्ट कप्तान थिए ।

मिसबाहले टेस्ट क्रिकेटमा १० शतक र ३९ अर्धशतक बनाएका छन् भने एकदिवसीय क्रिकेटमा ४२ अर्धशतक प्रहार गरेका छन् । उनले सन् २०१७ मा अन्तर्राष्ट्रिय क्रिकेटबाट सन्न्यास लिएका थिए । त्यसपछि सन् २०१९ देखि २०२१ सम्म पाकिस्तानको राष्ट्रिय क्रिकेट टोलीको मुख्य प्रशिक्षक तथा प्रमुख छनोटकर्ताको जिम्मेवारीसमेत सम्हालेका थिए ।

एनपीएलको तेस्रो संस्करणका लागि सुदूरपश्चिम रोयल्सले मिसबाहलाई मुख्य प्रशिक्षक नियुक्त गरेको हो । उनको अनुभव र प्रशिक्षण क्षमताले नेपाली क्रिकेटको विकासमा योगदान पुर्‍याउने अपेक्षा गरिएको छ ।

कार्यक्रममा क्रिकेटलाई केवल प्रतिस्पर्धात्मक खेलका रूपमा मात्र नभई युवा प्रतिभा विकास, आपसी सद्भाव र दुई देशबीचको सम्बन्ध प्रगाढ बनाउने माध्यमका रूपमा समेत अघि बढाउन सकिने विषयमा छलफल भएको थियो ।

  • Clock icon
    २०८३ कार्तिक ३०, सोमबार