उचाइतर्फ जान धरमर गरिरहेको शेयर बजारमा यो साताको पहिलो र दोस्रो कारोबारमा नै वृद्धि देखिएको छ।
हिजो आइतबार २६.५३ अंकले बढेर २६२२.२८ बिन्दुमा उक्लिएको सेयर बजार सोमबार ९.१९ अंकले बढेर २६३१.४८ बिन्दुमा पुगेको छ।
१४५ कम्पनीको सेयर मूल्य बढेको बजारमा ६ अर्ब ३८ करोड ७२ लाख रुपैयाँको कारोबार भएको छ। १०३ कम्पनीको सेयर मूल्य घटेको छ।
गएको साता पहिलो कारोबारमा आइतबार ३२.९२ अंकले ओरालो लागेकोमा सोमबार ४.७८ अंकले बढेको थियो। मंगलबार बजार ०.२२ अंकले घटेको बजार बुधबार पनि ०.३४ अंकले घटेको थियो।
बिहीबार पनि बजार ४.४४ अंकले घटेर २५९५।७५ बिन्दुमा झरेको थियो। बजार त्यसअघिको साता समग्रमा २६.४७ अंकले घटेको थियो।
अर्थतन्त्रमा सुधार हुँदै गएका आँकडाहरू आइरहँदा पनि पुँजी बजारमा भने निराशा नै देखिएको थियो। यो साता पहिलो र दोस्रो कारोबारमा बढेको बजारले लगानीकर्ता केही सम्हालिएका देखिन्छन्।
उतारचढावबाट माथि जानका लागि पुँजी बजारबारे स्पष्ट सोच राजनीतिक नेतृत्वमा पनि आवश्यक पर्ने विश्लेषकहरू बताउँछन्।
गएको वर्ष साउनमा कारोबार रकममा कीर्तिमान बनाउँदै लगातार बढिरहेको बजार त्यसयता भने उतारचढावबीच कमजोर अवस्थामा नै बढी रहेको छ।
गएको वर्ष असार ३१ गते २२४०.४१ बिन्दुमा रहेको बजारमा साउनभर उछाल देखिँदै ३०००.८१ को बिन्दुसम्म पुगेको थियो।
२०७८ भदौ २ गते कीर्तिमान बनेको हालसम्मकै उच्च ३१९९ को बिन्दु पार हुने पर्खाइमा रहेका लगानीकर्ता लामो समयदेखि पर्ख र हेरको अवस्थामा नै छन्।
