काठमाडौं । आज वैशाख २ गतेदेखि देशभर दोस्रो राष्ट्रिय आर्थिक गणना औपचारिक रूपमा सुरु भएको छ । राष्ट्रिय तथ्याङ्क कार्यालयका अनुसार गणनाका लागि आवश्यक गणक तथा सुपरीवेक्षकहरू सम्बन्धित क्षेत्रमा खटिइसकेका छन् ।
निर्धारित कार्यतालिका अनुसार स्थलगत तथ्याङ्क सङ्कलनको काम आगामी असारको पहिलो सातासम्म सम्पन्न गर्ने लक्ष्य राखिएको छ । यस कार्यलाई प्रभावकारी बनाउन करिब पाँच हजार जनशक्ति परिचालन गरिएको जनाइएको छ ।
अर्थ मन्त्रालयले आर्थिक गणनालाई मुलुकको समग्र आर्थिक तथा औद्योगिक अवस्थाको यथार्थ चित्र प्राप्त गर्ने महत्वपूर्ण आधारका रूपमा लिएको छ । मन्त्रालयले सबै सरोकारवालालाई सक्रिय सहयोग गर्न आग्रह गरेको छ ।
गणनाका क्रममा उद्योग, व्यापार, सेवा, सहकारी, निजी तथा सार्वजनिक क्षेत्रसँग सम्बन्धित प्रतिष्ठानहरूको संख्या, प्रकृति, लगानी, रोजगारी, उत्पादन तथा सेवा प्रवाहलगायत १८ वटा आर्थिक सूचकहरूको विवरण सङ्कलन गरिनेछ ।
यस अभियानमा देशभर रहेका दर्ता भएका तथा नभएका साना–ठूला व्यवसाय, उद्योग–कलकारखाना, रोजगारी सिर्जना गर्ने प्रतिष्ठान, गैरसरकारी संस्था, सरकारी निकाय, विद्यालय तथा अस्पतालहरूलाई समेटिनेछ । गणनाको प्रारम्भिक तयारी फागुन मसान्तमै सम्पन्न भइसकेको थियो ।
गणनालाई व्यवस्थित बनाउन चैतको सुरुवातदेखि देशभर ८४ वटा अस्थायी कार्यालय स्थापना गरी सञ्चालनमा ल्याइएको छ, जुन असार मसान्तसम्म रहनेछन् ।
यसअघि २०७५ सालमा गरिएको पहिलो राष्ट्रिय आर्थिक गणनामा देशभर नौ लाखभन्दा बढी प्रतिष्ठान सञ्चालनमा रहेको तथ्याङ्क सार्वजनिक भएको थियो । यसपटकको गणनाले आर्थिक गतिविधिको अद्यावधिक विवरण संकलन गरी नीति निर्माणमा महत्वपूर्ण योगदान पुर्याउने अपेक्षा गरिएको छ ।
