काठमाडौँ । चालु आर्थिक वर्ष २०८२/८३ को तेस्रो त्रैमाससम्म सिटिजन्स बैंक इन्टरनेसनल लिमिटेडले उल्लेखनीय वित्तीय सुधार गरेको छ। बैंकले सार्वजनिक गरेको अपरिष्कृत वित्तीय विवरणअनुसार खुद नाफा, सञ्चालन मुनाफा र अन्य सूचकहरूमा सकारात्मक वृद्धि देखिएको छ।
समीक्षा अवधिमा बैंकले १ अर्ब ३० करोड ६४ लाख ६१ हजार रुपैयाँ खुद नाफा आर्जन गरेको छ, जुन गत आर्थिक वर्षको सोही अवधिको तुलनामा ३५ दशमलव ८२ प्रतिशतले बढी हो। अघिल्लो वर्ष बैंकको नाफा ९६ करोड १८ लाख ९३ हजार रुपैयाँ मात्र रहेको थियो।
आम्दानीतर्फ मिश्रित अवस्था देखिएको छ। खुद ब्याज आम्दानी १ दशमलव ४८ प्रतिशतले घटेर ४ अर्ब ६७ करोड ८८ लाख ५९ हजार रुपैयाँमा सीमित भएको छ। अघिल्लो वर्ष सोही अवधिमा यो आम्दानी ४ अर्ब ७४ करोड ८९ लाख ७६ हजार रुपैयाँ थियो। त्यस्तै, खुद फि तथा कमिसन आम्दानी पनि २ प्रतिशतले घटेर ९१ करोड ७३ लाख ५६ हजार रुपैयाँमा झरेको छ।
तर, सञ्चालन मुनाफामा भने उल्लेखनीय सुधार देखिएको छ। समीक्षा अवधिमा सञ्चालन मुनाफा ३८ दशमलव ६१ प्रतिशतले बढेर १ अर्ब ८४ करोड ९२ लाख ७१ हजार रुपैयाँ पुगेको छ।
नाफा वृद्धिमा मुख्य योगदान इम्पेयरमेन्ट चार्जमा आएको गिरावटले दिएको देखिन्छ। यो चार्ज २ अर्ब १६ करोड रुपैयाँबाट घटेर १ अर्ब ४८ करोड ६४ लाख ८१ हजार रुपैयाँमा झरेको छ।
विवरणअनुसार बैंकको वितरणयोग्य मुनाफा ५० करोड ४४ लाख ५४ हजार रुपैयाँ ऋणात्मक रहेको छ।
नाफा बढेसँगै बैंकको प्रतिशेयर आम्दानी (ईपीएस) २ रुपैयाँ ५५ पैसाले बढेर ११ रुपैयाँ २३ पैसा पुगेको छ। प्रतिशेयर नेटवर्थ १५५ रुपैयाँ ९९ पैसा रहेको छ भने मूल्य आम्दानी अनुपात १८ दशमलव ७१ गुणा कायम भएको छ।
हाल १५ अर्ब ५० करोड ७४ लाख ६३ हजार रुपैयाँ चुक्ता पूँजी रहेको बैंकको जगेडा कोषमा ९ अर्ब १८ करोड ६७ लाख ७१ हजार रुपैयाँ सञ्चित छ।
कारोबार विस्तारतर्फ बैंकले चैत मसान्तसम्म २ खर्ब १३ अर्ब ४६ करोड ८८ लाख रुपैयाँ निक्षेप संकलन गर्दै १ खर्ब ६९ अर्ब ३९ करोड १२ लाख रुपैयाँ कर्जा प्रवाह गरेको छ।
यद्यपि, बैंकको खराब कर्जा अनुपात ५ दशमलव ७१ प्रतिशतबाट बढेर ६ दशमलव ८२ प्रतिशत पुगेको छ, जसले जोखिम व्यवस्थापनमा ध्यान दिनुपर्ने संकेत दिएको छ।
