काठमाडौं । समस्याग्रस्त सहकारी व्यवस्थापन समितिले समस्याग्रस्त घोषित १० वटा सहकारी संस्थाका ठूला ऋणीहरूको नाम सार्वजनिक गरेको छ। समितिले बुधबार सूचना जारी गर्दै प्रारम्भिक चरणमा १० सहकारीका प्रमुख ऋणीहरूको विवरण सार्वजनिक गरेको हो।
सार्वजनिक गरिएका सहकारीहरूमा घेदुङ बहुउद्देश्यीय सहकारी, हाम्रो सगरमाथा बहुउद्देश्यीय सहकारी, तपाई हाम्रो बहुउद्देश्यीय सहकारी, नागरिक कल्याण बहुउद्देश्यीय सहकारी, आइडियल यमुना बहुउद्देश्यीय सहकारी, तुलसी बहुउद्देश्यीय सहकारी, नेपाल वित्तीय सहकारी, ओरियन्टल कोअपरेटिभ सहकारी, गौतम श्री सहकारी र नेपाल सहकारी वित्तीय संस्था रहेका छन्।
समितिले अन्य समस्याग्रस्त सहकारीका ठूला ऋणीहरूको नाम पनि क्रमशः सार्वजनिक गरिने जनाएको छ। साथै, ऋणीहरूलाई यथाशीघ्र समितिको कार्यालयमा सम्पर्क गरी ऋण चुक्ता गर्न आग्रह गरिएको छ।
समितिका अनुसार तोकिएको समयमा ऋण नतिर्ने ऋणीहरूमाथि प्रचलित कानुनबमोजिम असुली प्रक्रिया अघि बढाइनेछ। यसले सहकारी क्षेत्रमा वित्तीय अनुशासन र पारदर्शिता कायम गर्न सहयोग पुग्ने अपेक्षा गरिएको छ।
साथै, बाँकी रहेका अन्य ऋणीहरूको विवरण पनि चरणबद्ध रूपमा सार्वजनिक गरिने भएकाले सम्बन्धित सबैलाई समयमै सम्पर्क गरी दायित्व पूरा गर्न समितिले पुनः आग्रह गरेको छ।
