फिलिपिन्समा हिजो शुक्रबार तालिमका क्रममा वायुसेनाका दुईवटा विमान एक आपसमा ठोक्किएका छन्। यस दुर्घटनामा दुवै विमानमा सवार चारैजना पाइलटको मृत्यु भएको छ।
दुर्घटना स्थानीय समयअनुसार, दिउँसो ३५१ बजे मनिलाको दक्षिणमा पर्ने लिपा सहरस्थित फर्नान्डो एयर बेस नजिकै भएको हो। दुवै ‘एसएफ-२६०’ विमान कम उचाइमा उडिरहेका थिए। एउटा विमानको भग्नावशेष सैन्यकर्मीहरूको ब्यारेक नजिकै खसेको रोयटर्सले जनाएको छ ।
फिलिपिन्सको वायुसेनाले एसएफ२६० विमानहरूको उडानमा रोक लगाएको छ। अनुसन्धान पूरा नभएसम्म यी विमानहरू उडाइने छैनन्। यस वर्ष हावामै विमानहरू ठोक्किएको यो विश्वकै पाँचौँ ठूलो दुर्घटना हो।
फिलिपिन्सले किनेको थियो १८ वटा विमान एसएफ-२६० इटालीमा बनेका ट्रेनिङ विमान हुन्। फिलिपिन्सले सन् २०१०(११ को अवधिमा यस्ता १८ वटा विमान इटालीको कम्पनीसँग किनेको थियो। यिनको प्रयोग वायुसेनाका पाइलटहरूलाई उडानको तालिम दिनका लागि गरिन्छ।
फिलिपिन्सको सेनाले लामो समयदेखि आफ्ना सैन्य सरसामानलाई आधुनिकीकरण गर्ने प्रयास गरिरहेको छ, तर यसका लागि आवश्यक बजेट जुटाउनु चुनौतीपूर्ण बन्दै आएको छ। देशले वायुसेनाका विमानका साथै नौसेना र थलसेनाको क्षमता पनि बढाउनु पर्नेछ।
दक्षिण चीन सागरमा चीनसँग बढ्दो क्षेत्रीय तनावका बीच यो आवश्यकता अझ महत्त्वपूर्ण बनेको छ।
सैन्य आधुनिकीकरणका कैयौँ योजनाहरूमा बजेटको अभाव र तिनलाई पूरा गर्न भइरहेको ढिलाइजस्ता समस्याहरू पनि अगाडि आएका छन्।
