ठमेल क्षेत्रमा साना व्यवसाय र मदिरा पसल अब राति १० बजेपछि सञ्चालन गर्न नपाइने भएको छ। ठमेल पर्यटन विकास परिषद्ले बढ्दो चोरी, लुटपाट र झैंझगडाका घटनाले सुरक्षा चुनौती निम्त्याएको भन्दै यस्तो निर्णय गरेको हो।
परिषद्का अनुसार सडकमा रातिको समयमा हुने भीडभाड र अवाञ्छित गतिविधि नियन्त्रण गर्न समयसीमा तोकिएको हो। रातभर खुला रहने साना मदिरा पसल र ठेलागाडाका कारण ठूला व्यवसाय प्रभावित भएको व्यवसायीको गुनासो पनि छलफलमा उठाइएको परिषद्ले जनाएको छ।
पर्यटन सिजन नजिकिँदै गर्दा ठमेललाई सुरक्षित र व्यवस्थित बनाउन सबै व्यवसायीको सक्रिय सहयोग आवश्यक रहेको परिषद्ले आग्रह गरेको छ। नयाँ नियम लागू भएपछि राति १० बजेपछि साना पसल तथा मदिरा व्यवसाय बन्द गर्नुपर्नेछ, जसले पर्यटक र स्थानीयको सुरक्षामा सकारात्मक प्रभाव पार्ने अपेक्षा गरिएको छ।
