आज सोमबार दिउँसो र राति पनि देशका विभिन्न स्थानमा मौसम बदली र वर्षाको क्रम जारी रहने सम्भावना देखिएको मौसम पूर्वानुमान महाशाखाले जनाएको छ।
महाशाखाका मौसमविद् सञ्जीव अधिकारीका अनुसार गएराति पनि देशका विभिन्न स्थानमा पानी परेको छ।
‘खासगरी बागमती र गण्डकी प्रदेशका भूभागमा वर्षा भएको छ’, उनले भने, ‘एकरदुई ठाउँमा भारी वर्षा पनि भएको छ।’
मौसमविद् अधिकारीका अनुसार आज बिहानीपख काठमाडौँ उपत्यकामा पनि वर्षा भएको छ। तर अहिले बिस्तारै रोकिने क्रममा रहेको उनले बताए।
‘बिहान साढे ४ बजेदेखि काठमाडौँ उपत्यकामा पानी परेको हो’, उनले भने, ‘अहिलेचाहिँ लगभग रोकिएको अवस्था छ।’
उनका अनुसार अब केही घण्टा पानी पर्ने सम्भावना देखिएको छैन। ‘बादल त लाग्छ तर आंशिक रूपमा घाम पनि देखिन्छ’, उनले भने, ‘तर अपराह्नतिर फेरि पानी पर्ने सम्भावना देखिन्छ।’
जल तथा मौसम विज्ञान विभाग मौसम पूर्वानुमान महाशाखाले हाल देशभर मनसुनी वायूको प्रभाव कमजोर रहे पनि स्थानीय वायूको प्रभाव रहेको जनाएको छ ।
महाशाखाका अनुसार अहिले सबै प्रदेशका पहाडी भूभागमा साधारणतया बदली रहनुका साथै केही प्रदेशका थोरै स्थानमा हल्का वर्षा भइरहेको छ ।
आज दिउँसो कोशी, बागमती र गण्डकी प्रदेशका पहाडी भूभागका केही स्थान तथा बाँकी प्रदेशका पहाडी भूभागका थोरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ ।
यसैगरी, आज राति गण्डकी र सुदूरपश्चिम प्रदेश लगायत बाँकी प्रदेशका पहाडी भूभागमा साधारणतया बदली रही बाँकी भूभागमा आंशिक बदली रहने छ ।
गण्डकी प्रदेशका पहाडी भूभागका केही स्थान, कोशी, बागमती, लुम्बिनी र सुदूरपश्चिम प्रदेशका पहाडी भूभागका थोरै स्थान तथा बाँकी प्रदेशका एकदुई स्थानमा मध्यम वर्षाको सम्भावना रहेको छ ।
