सोमबार साँझ काठमाडौंमा प्रसिद्ध कवि डॉ. नवराज लाम्सलको चौथो महाकाव्य “कल्प” केन्द्रित काव्यसाँझ कार्यक्रम “काव्यसाझ: कल्प” आयोजना गरिएको छ। कार्यक्रम ए क्यूब प्रमोसनले आयोजना गरेको थियो र यसले कविता तथा संगीतको दुर्लभ कलात्मक मिश्रण प्रस्तुत गर्यो।
डॉ. लाम्सलले आफ्नो महाकाव्यका चयनित श्लोकहरूको वाचन गर्दै प्रोफ. डॉ. निरञ्जन भण्डारीको प्रत्यक्ष बाँसुरी संगीतसँग प्रस्तुत गरे। दर्शकहरूका अनुसार कविता र बाँसुरीको संयोजनले साँझलाई भावनात्मक र रमाइलो वातावरणले भरिपूर्ण बनाएको थियो।
“कल्प” प्रकृति, संस्कृति र मानवतालाई समेट्ने सृजनात्मक कृति मानिन्छ र यसले भविष्यगत चेतनालाई पनि उजागर गरेको छ। वाचनका क्रममा बाँसुरीको मृदु स्वरसँगै श्रोताहरूले ध्यानपूर्वक सुन्दै भावनात्मक प्रतिक्रियासमेत देखाएका थिए।
डॉ. लाम्सलले व्यक्तिगत अनुभूति र चयनित कविता अंशहरूसँग मिक्स गर्दै हॉलमा उपस्थित दर्शकहरूलाई अन्तसम्म भावनात्मक रूपमा बाँध्न सफल भए। यस अवसरमा डॉ. लाम्सलले पहिलो पटक आफ्नो महाकाव्य प्रत्यक्ष बाँसुरी सङ्गीतसँग प्रस्तुत गरेका थिए। उनका कविताले दर्शकहरूलाई रेडियो नेपालमा सुनेका दिनहरू सम्झाउने अनुभव समेत दिलाएको थियो।
कार्यक्रममा साहित्य, शिक्षा र संस्कृतिका प्रतिष्ठित व्यक्तिहरू, साथै विभिन्न पेशाका विशिष्ट व्यक्तिहरूको पनि उल्लेखनीय उपस्थिती रहेको थियो। डॉ. लाम्सल नेपाली साहित्य र आधुनिक सञ्चार क्षेत्रमा एक अग्रणी व्यक्तित्व मानिन्छन्। अहिलेसम्म उनले दश पुस्तकहरू, जसमा चार महाकाव्य समावेश छन्, प्रकाशित गरिसकेका छन्।
