राष्ट्रिय आविष्कार केन्द्रका संस्थापक तथा पूर्वमन्त्री महावीर पुनले आसन्न निर्वाचनका लागि आफ्नो चुनावी खर्च जनस्तरबाटै संकलन गर्ने घोषणा गरेका छन्। उम्मेदवारी दर्ता गरेसँगै आफ्नो अभियानलाई पारदर्शी र जनमुखी बनाउन उनले सामाजिक सञ्जालमार्फत सहयोगको अपिल गरेका हुन्।
धेरै शुभचिन्तकहरूले चुनावी अभियानमा आर्थिक सहयोग गर्ने इच्छा देखाउँदै बैंक खाता र क्युआर (QR) कोड माग गरेपछि उनले विशेषगरी निर्वाचन प्रयोजनका लागि मात्रै एउटा छुट्टै बैंक खाता खोलेका छ। “धेरै साथीहरूको अनुरोध आएकाले चुनावका लागि मात्र भनेर यो नयाँ खाता खोलेको हुँ,” पुनले भनेका छन्, “यो खाताको सम्पूर्ण हिसाब-किताब पूर्ण रूपमा पारदर्शी गरिनेछ।”
सहयोगका लागि सार्वजनिक गरिएका विवरणहरू:
सहयोग गर्न चाहनेहरूका लागि पुनले राष्ट्रिय वाणिज्य बैंकको निम्न विवरण सार्वजनिक गरेका छन्:
-
खातावालाको नाम: महावीर पुन
-
बैंक: राष्ट्रिय वाणिज्य बैंक, टेकु शाखा
-
खाताको प्रकार: बचत खाता (Saving Account)
-
खाता नम्बर: १७००१०००२१४०६०१०
पछिल्लो समय राजनीतिमा खर्चिलो भड्किलोपन बढ्दै गएका बेला, पुनको यो कदमलाई राजनीतिक विश्लेषकहरूले ‘शुद्ध र पारदर्शी राजनीतिको सुरुवात’ का रूपमा हेरेका छन्। चुनावमा हुने फजुल खर्चलाई निरुत्साहित गर्दै जनताको सानो-सानो सहयोगबाट ठूलो परिवर्तन ल्याउन सकिन्छ भन्ने सन्देश पुनले दिन खोजेका देखिन्छन्।
