सालपा विकास बैंक लिमिटेडले चालु आर्थिक वर्ष २०८२/८३ को दोस्रो त्रैमास (पुस मसान्त) सम्मको अपरिष्कृत वित्तीय विवरण सार्वजनिक गरेको छ। विवरणअनुसार समीक्षा अवधिमा बैंकको खुद नाफा अघिल्लो वर्षको तुलनामा ९.६० प्रतिशतले बढेर १ करोड ४ लाख १ हजार रुपैयाँ पुगेको छ।
अघिल्लो आर्थिक वर्ष २०८१/८२ को सोही अवधिमा बैंकले ९४ लाख ८९ हजार ८७३ रुपैयाँ खुद नाफा आर्जन गरेको थियो।
व्यवसाय विस्तारतर्फ बैंकले सुधार देखाएको छ। पुस मसान्तसम्म बैंकले १ अर्ब ५३ करोड १९ लाख रुपैयाँ निक्षेप संकलन गरी १ अर्ब १४ करोड २९ लाख रुपैयाँ कर्जा प्रवाह गरेको छ।
तर बैंकको खुद ब्याज आम्दानीमा केही संकुचन आएको छ। गत वर्ष ३ करोड ६५ लाख ७५ हजार रुपैयाँ रहेको खुद ब्याज आम्दानी घटेर २ करोड ८१ लाख ५० हजार रुपैयाँमा सीमित भएको छ।
वित्तीय सूचकहरूअनुसार बैंकको प्रतिशेयर आम्दानी वार्षिक १ रुपैयाँ ९९ पैसा ऋणात्मक रहेको छ भने प्रतिशेयर नेटवर्थ १०१ रुपैयाँ ३१ पैसा कायम छ।
समीक्षा अवधिमा बैंकको खराब कर्जा पनि सुधारिएको छ। अघिल्लो वर्ष ५.७१ प्रतिशत रहेको खराब कर्जा घटेर ४.९२ प्रतिशतमा झरेको छ।
पुस मसान्तसम्म बैंकको चुक्ता पूँजी ५२ करोड २३ लाख ८८ हजार रुपैयाँ रहेको छ भने जगेडा कोषमा २ करोड २७ लाख ९७ हजार रुपैयाँ सञ्चित छ।
समग्रमा, सालपा विकास बैंकले नाफा र व्यवसाय विस्तारमा सुधार देखाएको छ भने खराब कर्जा घट्दै गएको तथ्यले बैंकको वित्तीय व्यवस्थापनमा सकारात्मक संकेत दिएको छ।
