काठमाडौं । विश्वप्रसिद्ध सवारी साधन निर्माता यामाहा मोटरले संयुक्त राज्य अमेरिकामा रहेको आफ्नो मुख्यालय क्यालिफोर्नियाको साइप्रसबाट जर्जियाको केनेसामा स्थानान्तरण गर्ने निर्णय गरेको छ।
टोकियो स्टक एक्सचेन्जमा सूचीकृत कम्पनीले आफ्नो अमेरिकी सहायक कम्पनी ‘यामाहा मोटर कर्पोरेसन, युएसए’ लाई सन् २०२६ को अन्त्यदेखि २०२८ सम्म पूर्ण रूपमा केनेसामा सार्ने योजना बनाएको जनाएको छ।
मुख्यालय स्थानान्तरणसँगै कम्पनीले साइप्रसस्थित आफ्ना स्वामित्वका सबै स्थिर सम्पत्ति बिक्री गर्ने निर्णय गरेको छ। करिब २५.१ एकड (झण्डै १,०२,००० वर्ग मिटर) क्षेत्रफलमा फैलिएको जग्गा, कार्यालय भवन तथा गोदामहरू बिक्री प्रक्रियामा जानेछन्। कम्पनीका अनुसार यो कदम अमेरिकामा सम्पत्ति उपयोगको दक्षता बढाउने र दीर्घकालीन नाफा संरचना मजबुत बनाउने उद्देश्यका साथ अघि सारिएको हो।
साइप्रसको सुविधा विगत ५० वर्षदेखि यामाहाको अमेरिकी मुख्यालयका रूपमा सञ्चालन हुँदै आएको थियो। सन् १९७८ मा जग्गा खरिद गरी १९७९ मा कार्यालय स्थापना भएपछि यो स्थान अमेरिकी सञ्चालनको केन्द्र बनेको थियो। तर व्यावसायिक प्राथमिकतामा परिवर्तनसँगै कम्पनीले सन् १९९९ मा ‘मरिन बिजनेस’ र २०१९ मा ‘मोटरस्पोर्ट्स बिजनेस’ लाई यसअघि नै जर्जियाको केनेसामा स्थानान्तरण गरिसकेको छ।
हाल साइप्रस कार्यालयमा मुख्यतया कर्पोरेट कार्य र वित्तीय सेवा सम्बन्धी विभाग मात्र बाँकी छन्। सम्पत्ति बिक्री प्रक्रियालाई सहज बनाउन कम्पनीले केही समयका लागि ‘सेल-एण्ड-लिजब्याक’ व्यवस्था अपनाउने योजना बनाएको छ। बिक्री मूल्य र सम्भावित खरिदकर्ताबारे अध्ययन भइरहेको जनाइएको छ।
अमेरिकी बजारमा बढ्दो भन्सार दर तथा परिवर्तनशील व्यावसायिक वातावरणका कारण लागत वृद्धि भएपछि कम्पनीले संरचनात्मक सुधारमार्फत खर्च नियन्त्रण र दीर्घकालीन नाफा सुदृढीकरणको रणनीति अघि बढाएको हो।
यस रणनीतिक स्थानान्तरणबाट यामाहाले आफ्नो उत्पादकत्व वृद्धि गर्ने र अमेरिकी बजारमा पकड अझ बलियो बनाउने विश्वास व्यक्त गरेको छ।
