काठमाडौं । नेपाल उद्योग वाणिज्य महासंघ को ६०औँ वार्षिक साधारणसभा तथा निर्वाचन नजिकिँदै गर्दा नेतृत्वका लागि प्रतिस्पर्धा तीव्र बनेको छ। आगामी २०२६ अप्रिल ११–१२ (२०८२ चैत २९–३०) मा हुने निर्वाचनलाई व्यवसायिक क्षेत्रले चासोका साथ हेरिरहेको छ।
यसै क्रममा शिवप्रसाद घिमिरेले उपाध्यक्ष (कमोडिटी) पदका लागि आफ्नो उम्मेदवारी घोषणा गरेका छन्। एसजी ग्रुपका अध्यक्षसमेत रहेका घिमिरे अञ्जन श्रेष्ठ प्यानलबाट चुनावी प्रतिस्पर्धामा उत्रिएका हुन्।
करिब तीन दशकको संस्थागत अनुभव बोकेका घिमिरेले आफूलाई परम्परागत व्यवसायिक मूल्य र आधुनिक डिजिटल अर्थतन्त्रबीचको सेतुका रूपमा प्रस्तुत गरेका छन्।
हालै सञ्चारमाध्यमसँगको कुराकानीमा उनले नेपालको वर्तमान अर्थतन्त्रमा बैंकिङ क्षेत्रमा पर्याप्त तरलता र न्यून ब्याजदर भए पनि लगानीकर्तामा विश्वासको अभाव देखिएको बताएका छन्। उनले नीति स्पष्टता नै लगानीमैत्री वातावरणको आधार भएको उल्लेख गर्दै पुराना कानुनका कारण लगानी वातावरण अवरुद्ध भएको दाबी गरे।
घिमिरेले वर्तमान कानुनी संरचना पुरानो भएको उल्लेख गर्दै लगानी अवरोध गर्ने ऐन तथा नियमहरूको पुनर्लेखन आवश्यक रहेको बताएका छन्। उनका अनुसार सरकारसँग समन्वय गरेर निजी क्षेत्रको विकासका लागि कानुनी सुधार प्राथमिकतामा राखिनेछ।
उनको मुख्य एजेन्डामध्ये डिजिटलाइजेसन पनि एक प्रमुख विषय हो। एफएनसीसीआई तथा सरकार–व्यवसाय (जीटूबी) प्रक्रियालाई पूर्ण रूपमा डिजिटल बनाउन सके भ्रष्टाचार न्यूनीकरण र सेवा प्रवाह छिटो हुने उनको भनाइ छ।
व्यवसायीहरूले कर प्रमाणपत्रलगायत साधारण प्रक्रियामा समेत लामो समय खर्चिनु पर्ने अवस्था अन्त्य गर्न डिजिटल प्रणाली आवश्यक रहेको उनले उल्लेख गरे। फाइल प्रणालीको अन्त्य गर्दै पारदर्शी र दक्षतामा आधारित सेवा प्रणाली स्थापना गर्ने उनको लक्ष्य छ।
देशबाट युवा पलायन रोक्न आर्थिक स्थिरता र रोजगारी सिर्जना अनिवार्य भएको घिमिरेले बताएका छन्। घरेलु लगानी सुरक्षित भएमा विदेशी लगानी समेत आकर्षित हुने उनको विश्वास छ।
निर्वाचन प्रतिस्पर्धात्मक भए पनि निजी क्षेत्र एकै परिवार भएको उल्लेख गर्दै उनले चुनावपछि सबै समूह मिलेर साझा उद्देश्यका लागि काम गर्ने बताए।
घिमिरे एसजी ग्रुपका संस्थापक हुन्, जसअन्तर्गत पेट्रोलियम, एलपी ग्यास, जलविद्युत, शिक्षा र अटोमोबाइलसहित ८० भन्दा बढी कम्पनी सञ्चालनमा छन्। उनी नेपाल एलपी ग्यास उद्योग संघका पूर्वअध्यक्षसमेत हुन्।
