कपिलवस्तु । नेपाल इनभेष्टमेन्ट मेगा बैंक (एनआईएमबी) को तौलिहवा शाखामा करिब १ करोड ६५ लाख रुपैयाँ ग्राहक खाताबाट अनियमित रूपमा निकालिएको घटनामा बैंककै कर्मचारी पक्राउ परेका छन्।
जिल्ला प्रहरी कार्यालय कपिलवस्तुले बैंकको तौलिहवा शाखामा कार्यरत २८ वर्षीय रिशव कार्कीलाई पक्राउ गरेको जनाएको छ। उनी बैंकको डिजिटल प्रणालीको प्रशासनिक पहुँचको दुरुपयोग गरी ग्राहकको रकम हिनामिना गरेको आरोपमा पक्राउ परेका हुन्। उक्त घटना चैत ११ गते (मार्च २५, २०२६) मा सार्वजनिक भएको हो।
प्रारम्भिक अनुसन्धान अनुसार यो घटना बाह्य ह्याक नभई बैंकभित्रकै ‘इनसाइड जब’ भएको देखिएको छ। अभियुक्त कार्कीले प्रणालीगत पहुँचको प्रयोग गर्दै तीन चरणमा अनियमितता गरेको पाइएको छ।
पहिलो चरणमा उनले बैंकको आन्तरिक प्रणालीमा प्रवेश गरी केही उच्च ब्यालेन्स भएका ग्राहकहरूको दर्ता मोबाइल नम्बर परिवर्तन गरेको, दोस्रो चरणमा ती खाताहरूको एसएमएस अलर्ट प्रणाली निष्क्रिय पारेको र तेस्रो चरणमा मोबाइल बैंकिङ तथा कनेक्टआईपीएसमार्फत रकम अन्य खातामा स्थानान्तरण गरेको अनुसन्धानमा देखिएको छ।
मायादेवी गाउँपालिका–१ बाट पक्राउ परेका कार्कीविरुद्ध बैंकिङ कसुर तथा सजाय ऐनअनुसार मुद्दा दर्ता गरिएको छ। उच्च अदालत तुलसीपुर, बुटवल इजलासले उनलाई थप अनुसन्धानका लागि सात दिनको म्याद दिएको छ।
प्रहरीले हालसम्म हिनामिना भएको रकम फिर्ता गर्ने प्रयास गरिरहेको छ भने घटनामा अन्य व्यक्तिको संलग्नता छ कि छैन भन्नेबारे पनि अनुसन्धान जारी रहेको जनाएको छ।
यस घटनापछि बैंकिङ सुरक्षाप्रति गम्भीर प्रश्न उठेको छ। प्रहरीले ग्राहकहरूलाई आफ्नो मोबाइल नम्बर र इमेल विवरण नियमित रूपमा जाँच गर्न, बैंक स्टेटमेन्ट समय–समयमा हेर्न तथा कुनै असामान्य गतिविधि देखिए तत्काल बैंक र प्रहरीलाई जानकारी दिन आग्रह गरेको छ।
