चितवन । चितवन चेम्बर अफ कमर्सले नेपाल चेम्बर अफ कमर्सको ७५औँ हीरक जयन्ती वर्षको अवसर पारेर “अन्तर्राष्ट्रिय व्यापार प्रवर्द्धन” विषयक एक महत्वपूर्ण अन्तर्क्रिया कार्यक्रम आयोजना गरेको छ। कार्यक्रम नेपाल चेम्बर अफ कमर्सका सल्लाहकार परिषद् अध्यक्ष तथा हीरक जयन्ती समारोह समिति संयोजक राजेश काजी श्रेष्ठको प्रमुख आतिथ्यतामा सम्पन्न भएको हो ।
कार्यक्रमलाई सम्बोधन गर्नुहुँदै प्रमुख अतिथि श्रेष्ठले नेपाली उत्पादनको विश्व बजारमा पहुँच विस्तार गर्नु आजको आवश्यकता मात्र नभई राष्ट्रिय आर्थिक समृद्धिको आधार रहेको उल्लेख गर्नुभयो। उहाँले भन्नुभयो, “नेपालका मौलिक तथा गुणस्तरीय उत्पादनलाई अन्तर्राष्ट्रिय बजारमा स्थापित गर्न सरकारी नीतिगत सहजीकरणसँगै निजी क्षेत्रको सक्रियता अपरिहार्य छ। चेम्बर अभियानलाई विश्वव्यापी सञ्जालमा विस्तार गर्दै अन्तर्राष्ट्रिय मेला, द्विपक्षीय व्यापार सम्झौता, लगानी साझेदारी, आयात-निर्यात सहजीकरणजस्ता विषयमा संस्थागत पहललाई अझ सशक्त बनाउनु आवश्यक छ।” श्रेष्ठले स्थानीय उद्यमीहरूलाई विश्व बजारसँग जोड्न चेम्बरले पुलको भूमिका निर्वाह गरिरहेको पनि उल्लेख गर्नुभयो। उहाँले भारत, चीन, भियतनाम लगायतका मुलुकसंग व्यापार साझेदारी तथा प्रबर्द्धनमा उल्लेख्य प्रगति हासिल भएको बारे चर्चा समेत गर्नुभएको थियो ।
कार्यक्रममा चितवन चेम्बर अफ कमर्सका अध्यक्ष गोपाल भट्टराईले अन्तर्राष्ट्रिय बजारमा नेपाली उत्पादनको पहुँच विस्तार गर्न नेपाल चेम्बर अफ कमर्स तथा अन्तर्राष्ट्रिय चेम्बरहरूको भूमिकाको प्रशंसा गर्नुभयो। उहाँले भन्नुभयो, “हाम्रो स्थानीय उत्पादनको पहिचान, गुणस्तर र मौलिकता नै हाम्रो शक्ति हो। त्यसलाई उचित ब्रान्डिङ र प्रवर्द्धनमार्फत विश्व बजारमा स्थापित गर्न सरोकारवाला सबै निकायबीच सहकार्य अझ मजबुत बनाउनुपर्छ।” साथै उहाँले चितवन क्षेत्रका कृषि, पर्यटन तथा साना तथा मझौला उद्योगका उत्पादनलाई अन्तर्राष्ट्रिय स्तरमा पुर्याउन थप रणनीतिक कार्यक्रम आवश्यक रहेकोमा जोड दिनुभयो।
यसैगरी, नेपाल चेम्बर अफ कमर्सका पूर्व उपाध्यक्ष राजेन्द्र अर्यालले चेम्बर अभियानमा जिल्ला, नगर तथा गाउँस्तरमा गठन भएका चेम्बरहरूको भूमिका उल्लेखनीय रहेको बताउनुभयो। उहाँले स्थानीय तहबाटै उद्यमशीलता विकास, बजार विस्तार र रोजगारी सिर्जनामा चेम्बरहरूले सकारात्मक योगदान पुर्याउँदै आएको धारणा राख्नुभयो।
कार्यक्रममा चितवन चेम्बर अफ कमर्सका सल्लाहकार मनोज रानाभाटले देशको आर्थिक विकासका लागि स्थानीय सरकार र चेम्बरबीचको साझेदारी अत्यन्त महत्वपूर्ण हुने उल्लेख गर्नुभयो। उहाँले नीति निर्माणदेखि कार्यान्वयनसम्म निजी क्षेत्रको अनुभव र स्थानीय तहको संरचनात्मक शक्तिबीच समन्वय हुन सकेमा आर्थिक गतिविधि अझ प्रभावकारी बन्ने विश्वास व्यक्त गर्नुभयो।
अन्तर्क्रिया कार्यक्रममा व्यवसायी, उद्योगी तथा सरोकारवाला निकायका प्रतिनिधिहरूको उल्लेखनीय सहभागिता रहेको थियो। सहभागीहरूले नेपाली उत्पादनको अन्तर्राष्ट्रिय प्रतिस्पर्धात्मक क्षमता अभिवृद्धि, निर्यातमुखी उद्योगको प्रवर्द्धन तथा लगानीमैत्री वातावरण निर्माणका विषयमा आफ्ना धारणा राख्दै कार्यक्रमलाई फलदायी बनाएका थिए।
