काठमाडौँ । काठमाडौँ महानगरपालिका र युवा तथा साना व्यवसायी स्वरोजगार कोषबीच सहुलियत ऋण उपलब्ध गराउने सम्झौता भएको छ। यस सम्झौताले सीप भएका तर पुँजी अभावमा उद्यम गर्न नसकेका युवालाई स्वरोजगारतर्फ अघि बढाउन सहयोग पुग्ने अपेक्षा गरिएको छ।
सम्झौता अनुसार सुरुमा ८ प्रतिशत ब्याजदरमा ऋण उपलब्ध गराइनेछ। असल ऋणीले तोकिएको मापदण्ड अनुसार नियमित किस्ता र ब्याज भुक्तानी गरेमा ब्याजको ६० प्रतिशत रकम अनुदानका रूपमा फिर्ता पाउने व्यवस्था गरिएको छ। यसरी हेर्दा वास्तविक ब्याज भार करिब ३.२ प्रतिशतमा सीमित हुने महानगरले जनाएको छ।
यस योजनाअन्तर्गत व्यक्तिगत रूपमा अधिकतम ५ लाख रुपैयाँ र १५ जनासम्मको समूह मिलेर अधिकतम ५० लाख रुपैयाँसम्म ऋण लिन सकिने व्यवस्था गरिएको छ। यो सुविधा विशेषगरी आर्थिक रूपमा विपन्न, महिला, दलित, वैदेशिक रोजगारीबाट फर्किएका तथा तालिम प्राप्त व्यक्तिहरूलाई लक्षित गरिएको छ।
यसका लागि काठमाडौँ महानगरपालिका र कोषले २–२ करोड रुपैयाँ राखेर छुट्टै कोष स्थापना गरेका छन्। कृषि, सूचना प्रविधि, हस्तकला, मर्मत सेवा तथा खुद्रा व्यापारजस्ता स्वदेशी सीप र श्रममा आधारित व्यवसायका लागि यो ऋण उपयोग गर्न सकिनेछ।
ऋण प्रक्रिया कोषले तोकेका बैंक तथा सहकारीमार्फत सञ्चालन हुनेछ। महानगरका अनुसार यो कार्यक्रमले युवाहरूलाई आफ्नै सीपलाई व्यवसायमा रूपान्तरण गर्दै स्वरोजगार बन्न महत्वपूर्ण अवसर प्रदान गर्नेछ।
