काठमाडौँ । बेस्ट फाइनान्स कम्पनि लिमिटेडले आफ्नो सेवा प्रवाहलाई अझ प्रभावकारी, आधुनिक र सेवाग्राहीमैत्री बनाउने रणनीतिअन्तर्गत शाखा समायोजन (मर्ज) प्रक्रियालाई अघि बढाएको जनाएको छ। कम्पनीले सार्वजनिक गरेको सूचनाअनुसार शाखा व्यवस्थापनलाई थप व्यवस्थित, प्रविधिमैत्री र समयानुकूल बनाउने उद्देश्यसहित शाखा संरचनामा पुनर्संरचना गरिएको हो।
वित्तीय क्षेत्रमा तीव्र प्रतिस्पर्धा, प्रविधिको बढ्दो प्रयोग र ग्राहकको बदलिँदो आवश्यकतालाई मध्यनजर गर्दै गरिएको शाखा समायोजनलाई कम्पनीले संस्थागत सुधार र सेवाको गुणस्तर अभिवृद्धिको महत्वपूर्ण कदमका रूपमा लिएको छ।
बैंकिङ प्रणाली अहिले परम्परागत काउन्टर सेवाबाट डिजिटल माध्यमतर्फ तीव्र रूपमा रूपान्तरण भइरहेको अवस्थामा बेस्ट फाइनान्सले पनि त्यसै अनुरूप आफ्नो रणनीति पुनःपरिभाषित गरेको देखिन्छ। शाखा विस्तार मात्र होइन, सेवा प्रभावकारिता, लागत व्यवस्थापन र प्रविधिमैत्री पहुँच विस्तार अहिलेको आवश्यकता भएकाले शाखा समायोजनलाई सकारात्मक कदमका रूपमा हेरिएको छ।
कम्पनी स्रोतका अनुसार अब सेवाग्राहीलाई मोबाइल बैंकिङ, इन्टरनेट बैंकिङ, डिजिटल भुक्तानी प्रणाली, क्यूआर सेवा, अनलाइन कारोबार तथा प्रविधिमा आधारित वित्तीय सेवामार्फत अझ छिटो, सुरक्षित र सहज सेवा प्रदान गरिनेछ।
डिजिटल बैंकिङको विस्तारसँगै सेवाग्राहीले शाखामा पुग्नुपर्ने बाध्यता क्रमशः घट्दै गएको छ। घरमै बसेर खाता सञ्चालन, रकम स्थानान्तरण, बिल भुक्तानी, किस्ता तिर्ने तथा अन्य वित्तीय कारोबार गर्न सकिने व्यवस्थाले बैंकिङ क्षेत्रलाई नयाँ युगमा प्रवेश गराएको छ। यही परिवर्तनलाई आत्मसात गर्दै बेस्ट फाइनान्सले आफ्नो सेवा प्रणालीलाई अझ आधुनिक बनाउने संकेत दिएको छ।
विज्ञहरूका अनुसार शाखा समायोजनलाई केवल शाखा बन्द गर्ने प्रक्रियाका रूपमा हेर्नु गलत हुन्छ। यो संस्थागत दक्षता, स्रोत व्यवस्थापन र डिजिटल क्षमताको सुदृढीकरणसँग जोडिएको रणनीतिक निर्णय हो। यसले कम्पनीलाई वित्तीय रूपमा अझ सबल, प्रतिस्पर्धी र सेवामुखी बनाउने विश्वास गरिएको छ।
बेस्ट फाइनान्सले सेवाग्राहीको हितलाई केन्द्रमा राख्दै भविष्यमा अझ आधुनिक बैंकिङ सेवा विस्तार गर्ने प्रतिबद्धता व्यक्त गरेको छ। बदलिँदो समयसँगै डिजिटल वित्तीय प्रणालीलाई अंगीकार गर्नु अहिलेको आवश्यकता मात्र होइन, भविष्यको आधार पनि भएको कम्पनीको बुझाइ छ।
वित्तीय क्षेत्रको बदलिँदो स्वरूपमा अब शाखाको संख्या होइन, सेवाको गति, पहुँच र प्रविधिको प्रभावकारिता महत्वपूर्ण मानिने अवस्था बनेको छ। यही यथार्थलाई आत्मसात गर्दै बेस्ट फाइनान्स डिजिटल युगको बैंकिङ यात्रामा अझ गहिरो रूपमा अघि बढ्ने तयारीमा देखिएको छ।
