मोरङ । स्रोत नखुलेको नगदसहित दुई जनालाई पक्राउ गरिएको छ । पक्राउ पर्नेमा एक भारतीय नागरिकसहित दुई जना रहेका छन् । प्रहरीले कुल रु २६ लाख ९८ हजार बरामद गरेको जनाएको छ ।
शनिबार काठमाडौँ जान लागेका अवस्थामा विराटनगर विमानस्थलबाट भारतको माल्दा जिल्ला सुजागञ्ज सिन्धा चन्चलाका ३६ वर्षीय मोहिदिल अलीलाई रु १५ लाख ९८ हजारसहित पक्राउ गरिएको जिल्ला प्रहरी कार्यालय मोरङकी प्रहरी नायब उपरीक्षक कोपिला चुँडालले जानकारी दिइन् ।
त्यसअघि शुक्रबार सोही विमानस्थलबाट धरान उपमहानगरपालिका–१८ का ३५ वर्षीय दिलीप तामाङलाई रु ११ लाख स्रोत नखुलेको रकमसहित पक्राउ गरिएको प्रहरीले जनाएको छ ।
दुवै जनाबाट बरामद गरिएको रकमको स्रोतबारे थप अनुसन्धान भइरहेको प्रहरीको भनाइ छ । विमानस्थलमा गरिएको निगरानीका क्रममा शंकास्पद गतिविधि देखिएपछि नियन्त्रणमा लिइएको बताइएको छ ।
प्रहरीले अवैध आर्थिक कारोबार रोकथामका लागि नियमित चेकजाँच र निगरानीलाई अझ कडा बनाइएको जनाएको छ ।
