काठमाडौँ । डोंगफेङ मोटर ले युरोपेली ग्राहकहरूको रुचि र आवश्यकता लक्षित गर्दै म्युनिख मा नयाँ डिजाइन केन्द्र स्थापना गरेको छ। कम्पनीले यो कदमलाई आफ्नो विश्वव्यापी विस्तार रणनीतिको महत्वपूर्ण हिस्साका रूपमा अघि सारेको जनाएको छ।
जनवरी २९ मा औपचारिक रूपमा उद्घाटन गरिएको उक्त केन्द्रले विशेषगरी M-Hero र Voyah का परियोजनामा काम गर्नेछ। कम्पनीका अनुसार युरोपेली बजारको स्वाद, जीवनशैली र सौन्दर्य चेतनालाई ध्यानमा राखेर नयाँ डिजाइन तथा प्रविधि विकास गरिनेछ।
नयाँ स्टुडियो डोंगफेङको एकीकृत विश्वव्यापी अनुसन्धान तथा विकास सञ्जालको हिस्सा हुनेछ। यसअघि चीनका वुहान र सांघाई मा सञ्चालनमा रहेका डिजाइन स्टुडियोसँग समन्वय गर्दै अब जर्मनीबाट पनि डिजाइन तथा प्रविधि विकासको काम अघि बढाइने कम्पनीले जनाएको छ।
डोंगफेङका अनुसार म्युनिखलाई अटोमोबाइल डिजाइन र इन्जिनियरिङको विश्वस्तरीय केन्द्रका रूपमा चिनिन्छ। यही कारण कम्पनीले युरोपेली बजारलाई नजिकबाट बुझ्न र स्थानीय प्रवृत्तिअनुसार उत्पादन विकास गर्न म्युनिख रोजेको हो।
स्टुडियोमा क्लाउड सोलुसन, भर्चुअल रियालिटी (VR), अग्मेन्टेड रियालिटी (AR) तथा कृत्रिम बुद्धिमत्ता (AI) आधारित उपकरण प्रयोग गरिनेछ। यी प्रविधिले डिजाइन विकास प्रक्रिया छिटो, प्रभावकारी र अन्तरदेशीय सहकार्यका लागि सहज बनाउने कम्पनीको विश्वास छ।
डिजाइन विकाससँगै यो केन्द्रले विश्वव्यापी मार्केटिङ तथा ब्रान्ड रणनीतिमा पनि भूमिका खेल्नेछ। कम्पनीले नयाँ बजारको मागअनुसार उत्पादनलाई छिटो अनुकूलन गर्दै युरोपेली उपभोक्तामाझ आफ्नो उपस्थिति थप बलियो बनाउने लक्ष्य लिएको जनाएको छ।
डोंगफेङको यो पहललाई प्रिमियम अटोमोबाइल सेग्मेन्टमा कम्पनीको उपस्थिति विस्तार गर्ने रणनीतिक कदमका रूपमा हेरिएको छ। विशेषगरी गुणस्तर, आधुनिक डिजाइन र प्रविधिलाई उच्च प्राथमिकता दिने युरोपेली बजारमा प्रतिस्पर्धात्मक स्थान बनाउन कम्पनीले ध्यान केन्द्रित गरेको छ।
घरेलु बजारबाहिर विस्तार गर्ने दीर्घकालीन योजनाअनुसार डोंगफेङले युरोपमा आफ्नो डिजाइन तथा अनुसन्धान क्षमता विस्तार गरेको हो। कम्पनीका अनुसार युरोपेली ट्रेण्ड र उपभोक्ता अपेक्षालाई केन्द्रमा राखेर विकसित गरिने M-Hero र Voyah मोडेलहरूले युरोपियन बजारमा सफल उपस्थिति बनाउन महत्वपूर्ण भूमिका खेल्नेछन्।
