एउटा ब्रिटिश कम्पनीले १८ सेकेन्डमा पूर्णरूपमा चार्ज गर्न सकिने अत्यधिक शक्तिशाली विद्युत् सवारीसाधन (ईभी) ब्याट्रीको ठूलो परिमाणमा उत्पादन गर्न स्वीकृति प्राप्त गरेको छ।
आरएमएल ग्रुप ले आफ्नो भारिभोल्ट ब्याट्रीका लागि जुन २ मा उत्पादनको सुनिश्चितता प्रमाणपत्र प्राप्त गरेको हो। यो सरकारी स्वीकृतिले कम्पनीले ईभी निर्माताहरूका लागि शक्तिशाली ब्याट्रीहरूको ठूलो मात्रामा उत्पादन गर्न सक्ने संकेत गर्छ।
“यो प्रमाणपत्रले हामीले प्रोटोटाइप र सिमित उत्पादनबाट ठूलो उत्पादन सम्झौताहरूको समर्थन गर्न तयार भएको कुरालाई पुष्टि गर्छ,” आरएमएल ग्रुपका पावरट्रेन प्रमुख जेम्स आर्केलले एक विज्ञप्तिमा भनेका छन्।
लाइभसाइन्सका अनसार आरएमएलको ब्याट्रीले छोटो समयमा अत्यधिक शक्ति दिन सक्छ। भारिभोल्ट ब्याट्रीले प्रति किलोग्राम ६ किलोवाट ऊर्जा दिन सक्छ र “यसले आफ्नो सबै शक्ति अत्यन्तै छिटो छुट्याउन सक्छ,” आरएमएल बोर्ड सदस्य माइकल म्यालकले भने। ब्याट्रीको सी रेटिङ २०० छ, जसको अर्थ यो ब्याट्री लगभग १८ सेकेन्डमा पूर्ण चार्ज वा डिस्चार्ज गर्न सक्छ।
तुलनाका लागि, पूर्णरूपमा विद्युतीय पोर्श टेक्यानको ब्याट्रीको सी रेटिङ लगभग ४ देखि ५ को बीचमा छ, जसले गर्दा यसलाई चार्ज वा डिस्चार्ज गर्न १२ देखि १५ मिनेट लाग्छ।
भारिभोल्ट ब्याट्रीको मोड्युलर डिजाइनले निर्माताहरूलाई यसलाई विभिन्न प्रयोजनअनुसार अनुकूल बनाउन मिल्छ। “हामी रेञ्जमा केन्द्रित हुन सक्छौं, शक्तिमा केन्द्रित हुन सक्छौं, वा दुवैको सन्तुलन गर्न सक्छौं,” आरएमएल ग्रुपका सीईओ पल डिकिन्सनले भने।
हाल आरएमएल समूहले भारिभोल्ट ब्याट्रीको थोरै संख्यामा मात्र उत्पादन गरिरहेको छ, तर भविष्यमा ठूलो परिमाणको उत्पादन भने विशेष उत्पादनहरूमा मात्र सीमित नहुने बताइएको छ।
कम्पनीले पुराना हाइपरकारहरू — जस्तै लाफरारी वा म्याकलरेन पी१का ब्याट्री प्याकहरूलाई अपडेटेड संस्करणमा रूपान्तरण गर्ने किट विकास गरिरहेको म्यालकले बताएको अन्तराष्ट्रिय समाचार संस्थाले जनाएका छन् ।
“यस्ता प्रकारका कारहरूका लागि हामी एउटा प्रतिस्थापन ब्याट्री प्याक तयार गर्न सक्छौं, जसले दायरा उल्लेखनीय रूपमा बढाउनेछ, र यदि कारको बाँकी हार्डवेयरले अनुमति दियो भने, तपाईंलाई आठ गुणा बढी शक्ति दिने संस्करण पनि पाउन सकिन्छ,” म्यालकले जनाएका छन् ।
