हामीले यही अगस्ट ३ तारिख ‘मास्टर्नी’ चलचित्रको प्रिमियर शो हेर्ने अवसर पायौँ। चलचित्र हेरेपछि आफ्नो धारणा सामाजिक सञ्जालमार्फत व्यक्त नगरी बस्न सकिनँ। मैले आफ्नो लेखमा पनि उल्लेख गरेको थिएँ-यो मैले हेरेका उत्कृष्ट नेपाली चलचित्रमध्ये एक हो।
मेरो उक्त लेखमा धेरै साथीभाइ, आफन्त तथा शुभचिन्तकहरूले सकारात्मक प्रतिक्रिया दिनुभयो। त्यसका लागि म सबैप्रति आभारी छु। तर केही प्रतिक्रियामा चलचित्रसँग कुनै सम्बन्ध नै नभएका विषयलाई लिएर अनावश्यक र नकारात्मक टिप्पणी गरिएको देख्दा भने आश्चर्य लाग्यो।
कुनै पनि कलाकारले चलचित्रको कथावस्तु र पात्रअनुसार फरक–फरक भूमिका निर्वाह गर्नुपर्छ—कहिले सकारात्मक, कहिले नकारात्मक, कहिले गम्भीर त कहिले कथाको आवश्यकताअनुसार अन्य प्रकारका प्रस्तुति पनि हुन सक्छन्। त्यसलाई चलचित्रको सम्पूर्ण कथासन्दर्भबाट हेर्नुपर्छ।
‘मास्टर्नी’मा ‘गणित सिकाउने’ जस्ता टिप्पणी वा आरोपसँग जोडिने कुनै प्रसंग नै छैन। त्यससँग सम्बन्धित भनिएको गीतसमेत यस चलचित्रको कथासँग कुनै सम्बन्ध राख्दैन। चलचित्रमा न त त्यस्तो गीत छ, न अनावश्यक अश्लीलता नै। प्रियंका कार्कीले यस चलचित्रमा एक आमाको साथै एक शिक्षिकाको भूमिकालाई अत्यन्तै जिम्मेवारीपूर्वक र प्रभावशाली ढंगले प्रस्तुत गर्नुभएको छ। मेरो व्यक्तिगत मूल्यांकनमा उहाँको यो भूमिका मैले उहाँका यसअघिका चलचित्रमा देखेका भूमिकामध्ये निकै उत्कृष्ट छ।
सबैभन्दा महत्वपूर्ण कुरा, प्रियंका कार्कीले जोखिम मोलेर नेपाली चलचित्र निर्माणमा लगानी गर्ने र नेपाली चलचित्रलाई नयाँ उचाइमा पुर्याउने साहस गर्नुभएको छ। ‘मास्टर्नी’ जस्तो चलचित्रले नेपाली चलचित्र उद्योगलाई अझ प्रतिस्पर्धी र सबल बनाउन योगदान पुर्याउने मेरो विश्वास छ। त्यसैले उहाँको निरन्तर प्रयास, सिर्जनशीलता र लगानीलाई निरुत्साहित गर्नेभन्दा प्रोत्साहन र हौसला दिनु हामी सबैको जिम्मेवारी हो।
मेरो सकारात्मक प्रतिक्रिया पनि मैले लगानी गरेको कारणले दिएको हो भन्ने केही टिप्पणीहरू देखिए। स्पष्ट पार्न चाहन्छु—मैले यस चलचित्रमा एक रुपैयाँ पनि लगानी गरेको छैन। चलचित्र हेरेर मलाई राम्रो लागेको कारण मात्र मैले आफ्नो धारणा सार्वजनिक गरेको हुँ। बरु, चलचित्र हेरेपछि उहाँको आगामी परियोजनामा लगानी गर्ने सम्भावनाबारे सोच्नसमेत प्रेरित भएको छु।
मैले चलचित्रको प्रशंसा गर्नुको मुख्य कारण सरल छ-‘मास्टर्नी’ साँच्चिकै राम्रो चलचित्र हो। चलचित्रमा थ्रिलरको राम्रो संयोजन छ, कथा अघि बढ्दै जाँदा उत्सुकता कायम रहन्छ, प्रस्तुति सभ्य र सन्तुलित छ, र सबैभन्दा महत्वपूर्ण कुरा, चलचित्र हेर्दा एक क्षण पनि बोरिङ महसुस हुँदैन।
अन्त्यमा मेरो सबैलाई विनम्र अनुरोध छ-कुनै पनि चलचित्रबारे धारणा बनाउनुअघि एकपटक चलचित्र हेर्नुहोस्। त्यसपछि आफ्नो निष्पक्ष प्रतिक्रिया दिनुहोस्। सकारात्मक वा नकारात्मक प्रतिक्रिया दिनु स्वाभाविक हो, तर पूर्वाग्रह वा नकारात्मक मानसिकताका आधारमा तथ्यहीन टिप्पणी गर्नुले कलाकार, निर्माता तथा सम्पूर्ण नेपाली चलचित्र क्षेत्रलाई निरुत्साहित मात्र गर्छ।
नेपाली चलचित्रलाई अझ माथि उठाउन हामीले स्वस्थ आलोचना, सकारात्मक सोच र सिर्जनात्मक प्रयासलाई प्रोत्साहन गर्न आवश्यक छ। ‘मास्टर्नी’को सम्पूर्ण टिमलाई हार्दिक बधाई तथा आगामी यात्राका लागि धेरै–धेरै शुभकामना।
मल्होत्राको अनुभब उहाको मेसेजबाट लिइएको हो ।
