काठमाडौं । कामना सेवा विकास बैंक लिमिटेडले ऋण भुक्तानीमा समस्या आएपछि धितो राखिएका जग्गा तथा भवन बिक्रीका लागि १५ दिने सार्वजनिक बोलपत्र आह्वान गरेको छ।
बैंकले ऋणी तथा धितो जमानीकर्ताको नाममा रहेको सम्पत्ति जहाँ जे जस्तो अवस्थामा छ, सोही अवस्थामा बिक्री गर्ने गरी सिलबन्दी बोलपत्र आह्वान गरेको हो।
बैंकका अनुसार दमक शाखाबाट प्रवाह भएको व्यावसायिक आवधिक कर्जा तथा घर कर्जा अन्तर्गत होटल न्यू मेमोरीकी सञ्चालक तथा ग्राहक अञ्जु ढकाल र थप धितो जमानीकर्ता कृष्णप्रसाद ढकालसँग सम्बन्धित सम्पत्ति बिक्रीमा राखिएको छ।
अञ्जु ढकाल झापा जिल्ला गौरादह नगरपालिका–५ की स्थायी बासिन्दा हुन् भने कृष्णप्रसाद ढकाल सुनसरीको बराहक्षेत्र नगरपालिका–५ का बासिन्दा हुन्।
यसअन्तर्गत झापा जिल्लाको महरानीझोडा गाविस वडा नम्बर ५(क) अन्तर्गत कित्ता नम्बर २६३२, क्षेत्रफल ०–१–१०–२.५५ अर्थात् ५०७.९९ वर्गमिटर जग्गा बिक्रीमा राखिएको छ।
त्यस्तै, सोही स्थानको कित्ता नम्बर २६३०, क्षेत्रफल ०–१–०–० अर्थात् ३३८.७० वर्गमिटर र कित्ता नम्बर २६२९, क्षेत्रफल ०–३–०–० अर्थात् १ हजार १६.११ वर्गमिटर जग्गासमेत बिक्री गरिने बैंकले जनाएको छ।
त्यसैगरी, बैंकको इटहरी शाखाबाट प्रवाह भएको सरल आवासीय कर्जा अन्तर्गत ऋणी तथा धितो जमानीकर्ता लालबहादुर बिष्ट र थप धितो जमानीकर्ता आदित्य बिष्टसँग सम्बन्धित सम्पत्ति पनि बिक्रीमा राखिएको छ।
सुनसरी जिल्ला इटहरी गाविस वडा नम्बर ३(क) अन्तर्गत कित्ता नम्बर १०४५ मा रहेको जग्गा तथा भवन, क्षेत्रफल ०–०–१३–० अर्थात् ४४०.२० वर्गमिटर, बैंकले सिलबन्दी बोलपत्रमार्फत बिक्री गर्न लागेको हो।
बोलपत्र फाराम कहाँ पाइन्छ ?
बोलपत्रमा सहभागी हुन चाहनेले बैंकको काठमाडौं ज्ञानेश्वरस्थित केन्द्रीय कार्यालय वा सम्बन्धित शाखाबाट १ हजार रुपैयाँको अप्रतिदेय शुल्क तिरेर आधिकारिक बोलपत्र फाराम प्राप्त गर्न सक्नेछन्।
बोलपत्रदाताले आफूले प्रस्ताव गरेको कुल रकमको कम्तीमा १० प्रतिशत रकम धरौटीस्वरूप बैंक खातामा जम्मा गर्नुपर्नेछ। वैकल्पिक रूपमा मान्यता प्राप्त बैंक तथा वित्तीय संस्थाबाट जारी भएको ‘गुड फर पेमेन्ट’ एकाउन्ट पेयी चेकसमेत पेश गर्न सकिने बैंकले जनाएको छ।
व्यक्तिगत बोलपत्रदाताले नेपाली नागरिकताको प्रमाणपत्रको प्रतिलिपि पेश गर्नुपर्नेछ। फर्म वा संस्थागत बोलपत्रदाताले फर्म/कम्पनी दर्ता प्रमाणपत्र, स्थायी लेखा नम्बर दर्ता प्रमाणपत्र, सञ्चालक समितिको निर्णय तथा कर चुक्ता प्रमाणपत्रलगायत आवश्यक कागजात पेश गर्नुपर्नेछ।
बोलपत्र २०८३ असोज १५ गते दिउँसो ४ बजेसम्म बैंकको ज्ञानेश्वरस्थित केन्द्रीय कार्यालयमा बुझाइसक्नुपर्नेछ।
असोज १६ गते बोलपत्र खोलिने
बैंकले प्राप्त बोलपत्रहरू २०८३ असोज १६ गते दिउँसो ४ बजे ज्ञानेश्वरस्थित केन्द्रीय कार्यालयमा खोल्ने जनाएको छ। बैंकका अनुसार स्वीकृत बोलपत्रको बाँकी रकम बैंकले तोकेको समयसीमाभित्र सफल बोलपत्रदाताले बुझाउनुपर्नेछ। तोकिएको समयमा बाँकी रकम जम्मा नगरेमा बोलपत्रसँगै राखिएको धरौटी रकम जफत हुने व्यवस्था गरिएको छ।
सम्पत्तिको स्वामित्व हस्तान्तरणका क्रममा लाग्ने सरकारी दस्तुर, दर्ता शुल्क तथा लागू हुने सम्पूर्ण कर र अन्य शुल्क सफल बोलपत्रदाताले नै व्यहोर्नुपर्ने बैंकले स्पष्ट पारेको छ।
यसरी कामना सेवा विकास बैंकले कर्जा असुली प्रक्रियाअन्तर्गत विभिन्न शाखाबाट प्रवाह गरिएका कर्जाको धितोमा रहेका जग्गा तथा भवनलाई सार्वजनिक बोलपत्रमार्फत बिक्री गर्न लागेको हो।
