काठमाडौँ । पछिल्लो समय प्रविधिको विकाससँगै सामाजिक सञ्जालमार्फत हुने वित्तीय ठगीका घटनाहरू बढ्दै गएपछि सिटिजन्स बैंकले सर्वसाधारणका लागि विशेष सचेतना सन्देश जारी गरेको छ। “फाइदा होइन, ठगी पक्का” भन्ने मुख्य नाराका साथ बैंकले ‘सम्पत्ति शुद्धीकरण निवारण राष्ट्रिय दिवस’ को अवसर पारेर लगानीकर्ता तथा ग्राहकहरूलाई सुरक्षित रहन आग्रह गरेको हो।
विशेष गरी फेसबुक, ह्वाट्सएप र इन्स्टाग्राम जस्ता सामाजिक सञ्जालहरूमा “छिटो पैसा कमाउने” वा “ग्यारेन्टी प्रतिफल” दिने भन्दै लोभ देखाएर गरिने विज्ञापनहरूबाट सतर्क रहन बैंकले ध्यानाकर्षण गराएको छ। यस्ता भ्रामक विज्ञापनको प्रलोभनमा परेर धेरैले आफ्नो मिहिनेतको कमाइ गुमाइरहेको भन्दै बैंकले शंकास्पद वैदेशिक वा आन्तरिक लगानीका प्रस्तावहरूलाई पूर्णतया बेवास्ता गर्न सुझाव दिएको छ।
बैंकिङ सुरक्षालाई मध्यनजर गर्दै सिटिजन्स बैंकले आफ्ना ग्राहकहरूलाई निम्न सावधानीहरू अपनाउन विशेष अनुरोध गरेको छ:
-
गोपनीयता कायम राख्नुहोस्: आफ्नो बैंक खाताको विवरण, ओटीपी (OTP) र अन्य व्यक्तिगत कागजपत्रहरू कहिल्यै पनि अपरिचित व्यक्ति वा सामाजिक सञ्जालमा साझा नगर्नुहोस्।
-
प्रमाण माग गर्नुहोस्: कुनै पनि संस्थामा लगानी गर्नुअघि त्यसको आधिकारिकता, कम्पनीको नाम र दर्ताको प्रमाणपत्र अनिवार्य रूपमा जाँच गर्नुहोस्।
-
विज्ञको परामर्श लिनुहोस्: लगानीका नयाँ क्षेत्रहरूबारे निर्णय लिनुअघि विश्वासिलो वित्तीय संस्था वा विज्ञहरूसँग सल्लाह लिनु बुद्धिमानी हुन्छ।
-
उजुरी गर्नुहोस्: कुनै पनि शंकास्पद वेबसाइट वा मेसेजहरू प्राप्त भएमा तुरुन्तै सम्बन्धित निकायमा रिपोर्ट गर्नुहोस्।
“लगानी गर्नुअघि सोच्नुहोस्, सतर्क रहनुहोस् र सुरक्षित रहनुहोस्” भन्ने सन्देश फैलाउँदै बैंकले वित्तीय साक्षरता र सुरक्षा नै ठगीबाट बच्ने उत्तम उपाय भएको उल्लेख गरेको छ। सम्पत्ति शुद्धीकरण निवारणमा सहयोग पुर्याउन र आफ्नो सम्पत्तिको सुरक्षा गर्न सबै नागरिकलाई जिम्मेवार बन्न बैंकले आह्वान गरेको छ।
