काठमाडौं । काठमाडौं महानगरपालिकाले विद्यार्थी र श्रमिकलाई सहज यात्रा उपलब्ध गराउने उद्देश्यसहित बिहानको समयमा पनि विद्युतीय बस सञ्चालन गर्ने योजना अघि सारेको छ ।
महानगरले सार्वजनिक यातायातलाई थप व्यवस्थित र वातावरणमैत्री बनाउन यस्तो योजना ल्याएको जनाएको छ । बिहानको समयमा बस सेवा विस्तार भएपछि दैनिक यात्रुहरू, विशेषगरी विद्यार्थी र कामकाजी नागरिकलाई आवतजावतमा सहजता हुने अपेक्षा गरिएको छ ।
यस्तै, बुढानीलकण्ठ र चन्द्रागिरी नगरपालिकाले ती विद्युतीय बसका लागि चार्जिङ स्टेशन उपलब्ध गराउने भएका छन् । चार्जिङ पूर्वाधार विस्तारसँगै विद्युतीय बस सञ्चालनलाई दिगो र प्रभावकारी बनाउन सहयोग पुग्ने जनाइएको छ ।
महानगरका अनुसार यस योजनाले काठमाडौं उपत्यकामा हरित यातायात प्रवर्द्धन गर्ने, इन्धनमा निर्भरता घटाउने तथा प्रदूषण नियन्त्रणमा समेत महत्वपूर्ण योगदान पुर्याउने विश्वास लिइएको छ ।
