काठमाडौं । नेपाल उद्योग वाणिज्य महासंघ (एफएनसीसीआई) को हालै सम्पन्न निर्वाचनमा वस्तुगत समूहबाट सागर ढकाल दोस्रो उच्च मत प्राप्त गर्दै कार्यकारिणी समिति सदस्य पदमा निर्वाचित भएका छन्। निजी क्षेत्रको प्रतिनिधित्व गर्ने यस महत्वपूर्ण जिम्मेवारीमा उनको विजयलाई व्यवसायी समुदायले सकारात्मक रूपमा लिएको छ।
निर्वाचनमा प्राप्त व्यापक समर्थनप्रति आभार व्यक्त गर्दै नव–निर्वाचित सदस्य ढकालले सम्पूर्ण वस्तुगत अध्यक्ष तथा प्रतिनिधिहरूप्रति हार्दिक धन्यवाद व्यक्त गरेका छन्। उनले प्राप्त मतलाई निजी क्षेत्रप्रतिको विश्वासको रूपमा लिँदै आगामी दिनमा अझ जिम्मेवारीका साथ काम गर्ने प्रतिबद्धता जनाएका छन्।
ढकालले भने, “यहाँहरूले दिनुभएको अमूल्य मत र विश्वासले मलाई अझ जिम्मेवार बनाएको छ। दोस्रो उच्च मतसहितको यो समर्थनले मेरो कर्तव्यबोधलाई थप मजबुत बनाएको छ। म एफएनसीसीआईमार्फत निजी क्षेत्रका मुद्दाहरूलाई सशक्त रूपमा उठाउनेछु र व्यवसायमैत्री नीति निर्माण, लगानी प्रवर्द्धन तथा आर्थिक गतिविधि विस्तारमा सक्रिय भूमिका निर्वाह गर्नेछु।”
उनले उद्योग–व्यवसायमैत्री वातावरण निर्माण, नीति सुधार, सरकारी तथा निजी क्षेत्रबीच सहकार्य विस्तार, लगानीको वातावरण सहज बनाउने तथा उद्यमशीलता प्रवर्द्धनमा विशेष ध्यान दिने बताए। साथै, साना तथा मझौला उद्यम (एसएमई) लाई सशक्त बनाउने, नवप्रवर्तनलाई प्रोत्साहन गर्ने र निजी क्षेत्रको साझा आवाजलाई अझ मजबुत बनाउने लक्ष्य रहेको उनले उल्लेख गरे।
ढकालले आफ्नो कार्यकालमा महासंघलाई अझ प्रभावकारी, समावेशी र परिणाममुखी संस्थाको रूपमा अघि बढाउने प्रतिबद्धता व्यक्त गर्दै सबै सरोकारवालासँग सहकार्य गर्दै अघि बढ्ने विश्वास पनि व्यक्त गरेका छन्।
