कुनै पनि सम्बन्धमा मायाको साथै समझदारी, विश्वास र सम्मान हुनु धेरै जरुरी हुन्छ। प्रायः मानिसहरू ठूला झगडाले मात्र सम्बन्ध बिगार्छन् भन्ने सोच्छन्। तर वास्तवमा कतिपय अवस्थामा सानातिना बानीले बिस्तारै सम्बन्धलाई कमजोर बनाइदिन्छन्।
मनोवैज्ञानिकहरूका अनुसार, सम्बन्धमा लगातार देखिने नकारात्मक व्यवहार, भावनाको बेवास्ता र कुराकानीको कमीले पार्टनरहरूबिचको दूरी बढाउन सक्छ। यी बानीहरूलाई समयमै परिवर्तन गर्न सके सम्बन्धलाई फेरि बलियो बनाउन सकिन्छ।
१) हरेक कुरामा आलोचना गर्नु
सम्बन्धमा सुझाव दिनु र गल्ती औँल्याउनु फरक कुरा हो। तर हरेक साना कुरामा पार्टनरको कमीकमजोरी मात्र खोज्दा सम्बन्धमा नराम्रो असर पर्न सक्छ। लगातार आलोचना गर्दा अगाडिको व्यक्तिलाई आफ्नो कुनै महत्त्व नभएको महसुस हुन सक्छ। सम्बन्धमा माया कायम राख्न गुनासो गर्नुको साटो समस्याको बारेमा कुरा गर्नुपर्छ। पार्टनरको राम्रो व्यवहार र प्रयासहरूको पनि कदर गर्नुपर्छ।
२) कुराकानीबाट भाग्नु वा मौन बस्नु
धेरै मानिसहरू रिसाएको बेला बोल्न छोड्छन् वा आफ्ना भावनाहरू साटासाट गर्दैनन्। सुरुवाती चरणमा यो सजिलो तरिका लाग्न सक्छ, तर लामो समयसम्म यसो गर्दा असमझदारी बढ्न सक्छ। स्वस्थ सम्बन्धमा खुलेर कुराकानी गर्नु आवश्यक हुन्छ। आफ्नो समस्यालाई शान्त रूपमा बताउँदा सम्बन्ध कमजोर होइन, झन् बलियो बन्छ।
३) पार्टनरको भावनालाई बेवास्ता गर्नु
सम्बन्धमा आफ्नो कुरा मात्र राख्ने र अगाडिको व्यक्तिको भावनालाई महत्त्व नदिने बानीले बिस्तारै दूरी निम्त्याउन सक्छ। हरेक मानिस आफ्नो कुरा सुनियोस् र बुझियोस् भन्ने चाहन्छ। यदि पार्टनरले बारम्बार आफ्नो समस्या बताउने प्रयास गरिरहेको छ र त्यसलाई बेवास्ता गरिँदै छ भने, यसले भावनात्मक निकटता कम गर्न सक्छ।
४) विश्वासको कमी र चाहिनेभन्दा बढी शङ्का गर्नु
विश्वास कुनै पनि सम्बन्धको जग हो। अकारण शङ्का गर्नु, बारम्बार प्रश्न सोध्नु वा पार्टनरको हरेक गतिविधिमा नजर राख्नुले सम्बन्धमा तनाव बढाउन सक्छ।
हुन त विश्वास निर्माण गर्न समय लाग्छ, तर लगातारको शङ्काले सम्बन्धमा असुरक्षाको भावना पैदा गर्न सक्छ। बलियो सम्बन्ध त्यही हो जहाँ दुवै जनाले एकअर्कालाई सम्मान र ‘स्पेस’ दिन्छन्।
