काठमाडौं । नबिल बैंक लिमिटेडले विदेशी मुद्रामा आम्दानी गर्ने व्यक्तिलाई लक्षित गर्दै ‘नबिल अमेरिकी डलर विशेष बचत खाता’ सञ्चालनमा ल्याएको छ । विदेशी मुद्रा आम्दानीको प्रमाणित स्रोत भएका व्यक्तिलाई लक्षित गरी ल्याइएको यस खातामार्फत अमेरिकी डलरमा बचत गर्नुका साथै ब्याज आम्दानी र अन्तर्राष्ट्रिय बैंकिङ सेवाको सुविधा प्राप्त गर्न सकिनेछ ।
नेपाल राष्ट्र बैंक तथा नबिल बैंकको विदेशी विनिमयसम्बन्धी नियमअनुसार योग्य व्यक्तिले यस खातामा रकम जम्मा गर्न सक्नेछन् । विदेशी मुद्रामा तलब प्राप्त गर्ने पेसाकर्मी, अन्तर्राष्ट्रिय ग्राहकसँग काम गर्ने स्वतन्त्र पेसाकर्मी, गैरआवासीय व्यक्ति तथा नेपालमा कानुनी रूपमा बसोबास गर्ने विदेशी नागरिक यस खाताका लागि योग्य हुनेछन् ।
खाता खोल्न आवश्यक कागजात
नबिल अमेरिकी डलर विशेष बचत खाता खोल्न इच्छुक ग्राहकले बैंकमा खाता खोल्ने आवेदन फाराम पूर्ण रूपमा भरी हस्ताक्षरसहित पेस गर्नुपर्नेछ । यसका साथै वैध राहदानी वा नागरिकताजस्ता आधिकारिक परिचयपत्र, खातावालाको हालसालै खिचिएको पासपोर्ट आकारको फोटो तथा विदेशी मुद्रा आम्दानीको वैध स्रोत पुष्टि गर्ने कागजात अनिवार्य रूपमा बुझाउनुपर्नेछ ।
विदेशी मुद्रा आम्दानीको प्रमाणका रूपमा रोजगारी सम्झौता, तलब विवरण, विदेशी विप्रेषण प्राप्तिको प्रमाण वा परामर्श सेवासम्बन्धी सम्झौताजस्ता कागजात पेस गर्न सकिनेछ ।
५०० अमेरिकी डलर न्यूनतम मौज्दात
यस खातामा खाता खोल्न तथा सञ्चालन गर्न न्यूनतम ५०० अमेरिकी डलर जम्मा गर्नुपर्ने व्यवस्था गरिएको छ । खातामा प्रारम्भिक रूपमा जम्मा गरिएको उक्त ५०० अमेरिकी डलर बैंकले धितोस्वरूप रोक्का राख्नेछ । यो रकम खाता सक्रिय रहुन्जेल न्यूनतम मौज्दातका रूपमा कायम राख्नुपर्नेछ ।
खातामा जम्मा गरिएको रकममा भने बैंकले नियामकीय निर्देशनअनुसार समय–समयमा प्रकाशित गर्ने विदेशी मुद्रा निक्षेपको ब्याजदरअनुसार ब्याज प्रदान गर्नेछ ।
बैंकिङ सेवासँगै अतिरिक्त सुविधा
नबिल बैंकको यस खातामार्फत ग्राहकले आफ्नो कारोबारको विवरण समेटिएको आधिकारिक बैंक विवरणपत्र आवश्यकताअनुसार प्राप्त गर्न सक्नेछन् । कर विवरण पेस गर्न तथा अन्य प्रयोजनका लागि प्रयोग गर्न मिल्ने बैंक विवरणपत्रका साथै खातावालाले चेकबुक सुविधा पनि प्राप्त गर्नेछन् ।
त्यसैगरी, आधिकारिक तथा प्रशासनिक प्रयोजनका लागि विदेशी मुद्रा मौज्दात प्रमाणपत्र उपलब्ध गराइनेछ । ग्राहकले बैंकका तोकिएका शाखामा उपलब्धताका आधारमा सुरक्षित निक्षेप लकर सुविधा पनि लिन सक्नेछन् ।
डिजिटल बैंकिङ र अन्तर्राष्ट्रिय कार्डमा छुट
यस खाताका ग्राहकले खाता सञ्चालनमा आएको पहिलो वर्ष नबिलको एनबैंक मोबाइल बैंकिङ एप निःशुल्क प्रयोग गर्न पाउनेछन् । त्यस्तै, एनबैंक वेब इन्टरनेट बैंकिङ सेवा पनि कुनै सेवा शुल्कबिना उपलब्ध हुनेछ ।
अन्तर्राष्ट्रिय भिसा इलेक्ट्रोन डेबिट कार्डको कुल सदस्यता शुल्कमा २५ प्रतिशत छुटका साथै पहिलो वर्षको सदस्यता शुल्क पूर्ण रूपमा मिनाहा गरिनेछ । नबिल क्रेडिट कार्डको कुल सदस्यता शुल्कमा पनि २५ प्रतिशत छुट र पहिलो वर्षको सदस्यता शुल्कमा पूर्ण छुट उपलब्ध हुनेछ ।
अन्तर्राष्ट्रिय कारोबारलाई थप सहज बनाउन बैंकले स्विफ्टमार्फत गरिने अन्तर्राष्ट्रिय रकम स्थानान्तरणमा नियमित सेवा शुल्कमा ५० प्रतिशत छुट दिने व्यवस्था गरेको छ । यद्यपि, प्रत्येक कारोबारमा न्यूनतम ३०० रुपैयाँ सेवा शुल्क लाग्नेछ ।
विदेशी मुद्रामा आम्दानी गर्ने व्यक्तिलाई नेपालमै अमेरिकी डलरमा बचत गर्न, ब्याज आम्दानी गर्न तथा अन्तर्राष्ट्रिय वित्तीय कारोबार सञ्चालन गर्न सहज बनाउने उद्देश्यले यो खाता ल्याइएको हो । डिजिटल बैंकिङ, अन्तर्राष्ट्रिय कार्ड तथा स्विफ्ट कारोबारमा छुटलगायतका सुविधाले विदेशी मुद्रा आम्दानीकर्तालाई आफ्नो रकम व्यवस्थापन गर्न सहयोग पुग्ने बैंकको यस योजनाको विशेषता रहेको छ ।
