चितवनको नारायणगढ–मुग्लिन सडकखण्डमा माथिबाट खसेको ढुङ्गा गुडिरहेको ट्रकमा लाग्दा भारतीय ट्रकमा सवार तीन जना घाइते भएका छन्।
आज बिहीबार दिउँसो चितवनको इच्छाकामना गाउँपालिका–५ स्थित तुइनखोला नजिक सडकमाथिबाट झरेको ढुंगा गुडिरहेको ट्रकमा लाग्दा तीन जना घाइते भएका हुन्।
नारायणगढबाट मुग्लिनतर्फ जाँदै गरेको केए–४३६८८५६ नम्बर प्लेटको भारतीय ट्रकमाथि ढुंगाले लाग्दा दुर्घटना भएको चितवन प्रहरीले जनाएको छ।
घाइते हुनेमा ट्रक चालक भारत, बैंगलोरका मेगु प्रसाद, उनका छोरा सयद अफिद र सोही ठाउँका नहमान धुनियाँ रहेका छन्। घाइतेमध्ये चालकको अवस्था गम्भीर रहेको जिल्ला प्रहरी कार्यालय चितवन प्रहरीले जनाएको छ ।
प्रहरीका अनुसार घाइते तीनै जनाको भरतपुरस्थित सरकारी अस्पतालमा उपचार भइरहेको छ। दुर्घटनाग्रस्त ट्रकलाई सडकको छेउमा साइड लगाएर सवारी आवागमन सुचारु गरिएको छ। हाल सडक दुईतर्फी नै सञ्चालनमा रहेको छ ।
