राष्ट्रिय खेलकुद परिषद (राखेप)ले आफ्नो ६२ औं वार्षिकोत्सवको अवसरमा आयोजना गरेको सम्मान तथा पुरस्कार कार्यक्रममा खेलाडीलाई पुरस्कार नै नदिएको संस्थालाई सम्मानित गरेको पाइएको छ ।
वार्षिकोत्सवमै उत्कृष्ट खेलाडी पुरस्कार प्राप्त गरेका खो-खो पुरुष तथा महिला टिमको हालत पनि यस्तै छ । विश्वकपमा रजत पदक विजेता दुवै टोलीलाई सरकारले घोषित पुरस्कार प्रदान नगरेको अवस्थामा राखेपको वार्षिकोत्सवमा भने युवा तथा खेलकुद मन्त्री तेजुलाल चौधरी स्वयंले खेलाडीहरुलाई सम्मान गरे ।
सम्मान कार्यक्रम अन्तर्गत नै उत्कृष्ट पत्रकार पुरस्कारमा पनि प्रश्न गर्ने ठाउँ रहेको छ । राखेपले नेपाल खेलकुद पत्रकार मन्चका महासचिव अन्जन खड्कालाई उत्कृष्ट पत्रकार पुरस्कार प्रदान गरेको थियो ।
पत्रकारलाई पुरस्कार प्रदान गर्ने समितिका संयोजक लोकेन्द्र बस्नेतले छनोटमा पत्रकारको सक्रियता, राखेपको कार्यक्रममा उपस्थिति लगायत विषयलाई प्राथमिकतामा राखिएको बताए । तर पुरस्कृत भएका खड्का जुलाई २०२३ मा महिला विश्वकप रिपोर्टिङका लागि अष्ट्रेलिया गएको झन्डै १३ महिनापछि नेपाल फर्केका थिए । अष्ट्रेलिया जानुअघि द राइजिङ नेपालमा कार्यरत उनी फर्केपछि भने खेलाडी डट कममा कार्यरत छन् ।
खड्कालाई दिइएको सम्मान पत्रमा भनिएको छ, ‘ नेपाली खेलक्षत्रेले गरेका गतिविधिलाई सञ्चार माध्यमबाट आम नागरिकसम्म पुर्याउन गरेको भूमिका सम्मानयोग्य छ । खेलकुदको वृहत्तर हितका लागि रचनात्मक रुपमा पत्रकारिताको माध्यमबाट गरेको योगदानलाई उच्च मुल्यांकन गर्दै यो सम्मान प्रदान गरिएको छ।’
बस्नेत संयोजक रहेको उक्त समितिमा राखेप कर्मचारी संघका महासचिव कुमार बस्नेत र नेपाल खेलकुद पत्रकार मन्चका वरिष्ठ उपाध्यक्ष प्रज्वल ओली सदस्य छन् ।
