सरकारले चालु आर्थिक वर्षको पहिलो पाँच महिनामा उत्साहजनक राजस्व संकलन गरेको छ। अर्थ मन्त्रालयले सार्वजनिक गरेको तथ्यांकअनुसार साउनदेखि मंसिरसम्मको अवधिमा सरकारले कुल लक्ष्यको ७८.७४ प्रतिशत राजस्व संकलन गर्न सफल भएको हो।
उक्त अवधिमा सरकारले ४ खर्ब ९ अर्ब ७८ करोड रुपैयाँ राजस्व उठाएको छ। पाँच महिनाका लागि ४ खर्ब ९५ अर्ब २ करोड रुपैयाँ राजस्व संकलन गर्ने लक्ष्य तय गरिएको थियो। संकलित राजस्वमध्ये अन्तःशुल्कबाट मात्र ७६ अर्ब रुपैयाँभन्दा बढी उठेको अर्थ मन्त्रालयले जनाएको छ।
अन्तःशुल्क मदिरा, बियर, चुरोट तथा अन्य सुर्तीजन्य पदार्थमा लाग्ने शुल्कबाट संकलन हुने गर्छ। यस्ता वस्तुको स्वदेशी उत्पादनसँगै पैठारीमा समेत अन्तःशुल्क लाग्ने व्यवस्था छ।
मंसिर महिनामा मात्र सरकारले ९५ अर्ब २० करोड रुपैयाँ राजस्व संकलन गर्ने लक्ष्य राखेकोमा ८० अर्ब २७ करोड रुपैयाँ संकलन भएको छ। मंसिर २९ गते एकै दिनमा ३ अर्ब ४४ करोड रुपैयाँ राजस्व उठाइएको थियो।
चालु आर्थिक वर्षका लागि सरकारले कुल १४ खर्ब ८० अर्ब रुपैयाँ राजस्व संकलन गर्ने लक्ष्य लिएको छ।
तुलनात्मक रूपमा, गत आर्थिक वर्षको यही अवधिमा सरकारले ४ खर्ब ५ अर्ब ७७ करोड रुपैयाँ राजस्व संकलन गरेको थियो। त्यस्तै, गत वर्ष मंसिर महिनामा मात्र ८७ अर्ब ७६ करोड रुपैयाँ राजस्व उठाइएको थियो।
