काठमाडौं । गत भदौ २३–२४ मा भएको ‘जेनजी’ आन्दोलनका क्रममा भौतिक क्षति र सेवा अवरुद्ध हुँदा चन्द्रागिरि हिल्स लिमिटेडको वित्तीय अवस्था प्रभावित भएको छ। चालु आर्थिक वर्ष २०८२/८३ को दोस्रो त्रैमासिक (साउन–पुस) वित्तीय प्रतिवेदन अनुसार कम्पनीको आम्दानी र नाफामा गिरावट देखिएको छ।
साउनदेखि पुस मसान्तसम्म कम्पनीले २४ करोड ८९ लाख रुपैयाँ सञ्चालन आम्दानी आर्जन गरेको छ, जुन गत वर्षको सोही अवधिको ४२ करोड २५ लाख रुपैयाँको तुलनामा उल्लेख्य कम हो। आम्दानी घटेसँगै कम्पनीले ४ करोड ७० लाख रुपैयाँ खुद घाटा व्यहोर्नुपरेको छ। अघिल्लो वर्ष सोही अवधिमा कम्पनी ६ करोड ६४ लाख रुपैयाँ खुद नाफामा रहेको थियो।
प्रतिवेदन अनुसार कम्पनीको प्रतिसेयर आम्दानी (ईपीएस) ३.०७ रुपैयाँ ऋणात्मक भएको छ, जबकि गत वर्ष ४.३३ रुपैयाँ धनात्मक थियो। हाल कम्पनीको प्रतिसेयर नेटवर्थ १०३.०२ रुपैयाँ र प्रतिसेयर कुल सम्पत्तिको मूल्य २५६.१६ रुपैयाँ कायम रहेको छ।
कम्पनीका अनुसार आन्दोलनका क्रममा भौतिक संरचना र केवलकार उपकरणहरूमा क्षति पुगेपछि सेवा पूर्ण रूपमा बन्द गर्नुपरेको थियो। झण्डै तीन महिनापछि मंसिर १५ गतेदेखि सेवा पुनः सञ्चालनमा आएपछि आम्दानीमा ठुलो प्रभाव परेको हो। तोडफोडबाट भएको क्षतिको पूर्ति गर्न बिमा दाबी प्रक्रिया समेत अघि बढाइएको छ।
वित्तीय विवरण अनुसार समीक्षा अवधिमा कम्पनीको कुल खर्च १२ करोड ४८ लाख रुपैयाँ रहेको छ। कम्पनीको चुक्ता पूँजी १ अर्ब ५३ करोड ४० लाख ९१ हजार रुपैयाँ रहेको छ भने जगेडा कोषमा ४ करोड ६२ लाख रुपैयाँ सञ्चित छ। दीर्घकालीन ऋण र दायित्वहरू २ अर्ब २१ करोड रुपैयाँ पुगेको प्रतिवेदनले देखाएको छ।
