वीरगन्ज । वीरगन्ज नाका हुँदै चालु आर्थिक वर्षको पहिलो नौ महिनामा ६ खर्ब ९४ अर्ब ५ करोड रुपैयाँ बराबरका वस्तु तथा सामान आयात भएको छ ।
वीरगन्ज भन्सार कार्यालयका अनुसार गत आर्थिक वर्षको सोही अवधिको तुलनामा यस वर्ष आयात ८० अर्ब ४४ करोड रुपैयाँ अर्थात् १३ प्रतिशतले वृद्धि भएको हो । गत वर्षको नौ महिनामा ६ खर्ब १३ अर्ब ६१ करोड रुपैयाँ बराबरका वस्तु आयात भएका थिए ।
भन्सार कार्यालयका सूचना अधिकारी उदयसिंह विष्टका अनुसार यो नाका हुँदै हुने आयातमा उल्लेखनीय वृद्धि देखिएको छ ।
आयातित वस्तुहरूमा पेट्रोलियम पदार्थ प्रमुख स्थानमा रहेको छ । चालु आवको नौ महिनामा १ खर्ब ४८ अर्ब १६ करोड रुपैयाँ बराबरको पाँच प्रकारका पेट्रोलियम पदार्थ आयात भएको छ । गत वर्ष सोही अवधिमा १ खर्ब ४० अर्ब १० करोड रुपैयाँको पेट्रोलियम पदार्थ आयात भएको थियो ।
त्यसैगरी, फलाम तथा फलामजन्य वस्तु ६२ अर्ब २६ करोड रुपैयाँ बराबरको आयात भएको छ, जुन गत वर्षको ५५ अर्ब ९ करोड रुपैयाँको तुलनामा वृद्धि हो ।
भटमासको कच्चा तेल आयात पनि बढेको छ । यस वर्ष ५० अर्ब ४० करोड रुपैयाँ बराबरको आयात भएको छ भने गत वर्ष ३८ अर्ब १५ करोड रुपैयाँको मात्र आयात भएको थियो ।
मेसिनरी तथा पार्टपुर्जा आयात ४९ अर्ब १३ करोड रुपैयाँ पुगेको छ भने इलेक्ट्रिक मेसिनरी उपकरण तथा पार्टपुर्जा ३४ अर्ब १९ करोड रुपैयाँ बराबरको आयात भएको छ ।
समग्रमा चालु आर्थिक वर्षको नौ महिनामा वीरगन्ज नाकाबाट १ खर्ब ७७ अर्ब ६६ करोड रुपैयाँ राजस्व सङ्कलन भएको भन्सार कार्यालयले जनाएको छ ।
आयात बढे पनि राजस्व सङ्कलनमा सुधार देखिनु सकारात्मक संकेतका रूपमा लिइएको छ ।
